1995年6月20日創刊嘅《生果報》，剛剛走過26個年頭，一直被批評為「干政」、「假」同「淫」，最新消息，就係《生果報》可能喺未來幾日關閉，有唔少人對此消息表示「振奮」，而《生果報》仝人，似乎直到今日，都依然認為《生果報》係被打壓。例如今日《生果報》嘅「蘋論」，就講明自己「捍衞新聞自由 俯仰無愧」，囍雨只想講句，有新聞自由，唔代表可以任意妄為，更加唔代表可以挑戰法律！《壹傳媒》創辦人黎智英被捕，係呢個道理；日前《生果報》董事、高層被捕，亦係相同道理。

偷換概念的「辯護」

綜觀《生果報》呢篇由盧峯撰寫嘅「蘋論」，一如《生果報》其他評論文章，歪理特別多，盧峯首先質疑「國安法控罪的紅線模糊不清」，繼而講到新聞自由，之後就稱基於事實嘅報道、評論都可能被視為「觸碰紅線而被調查、追究、拘捕、起訴」。囍雨想簡單評論，講到《港區國安法》，其實關於不同罪行嘅原則以至罰則都相當清晰；講新聞自由，有新聞自由，同係咪可以挑戰法律、違反法律，係兩回事；至於所謂基於事實嘅報道或評論，盧峯係咪將誹謗罪嘅辯護理由套用埋去其他罪行？好似偷換概念喎！

囍雨相信，依家唔少媒體已經開始為《生果報》「埋單」計數，《生果報》發行咗26年，呢條數的確有排計，如果大家問囍雨，囍雨都會用「干政」、「假」同「淫」去計呢條數。先講「干政」，好多時每逢7月1日，《生果報》必定「吹雞」叫人上街示威，而作為《壹傳媒》創辦人嘅黎智英，除咗被踢爆係反對派嘅「共主」、「金主」、「大台」、「黨鞭」，有捐錢俾部分反對派政客之外，2019年7月，黎智英赴美時更宣稱過自己「為美國而戰」。上年5月底，《生果報》甚至以頭條報道，呼籲香港市民「一人一信」，要時任美國總統干預香港事務。

又「假」又「淫」

至於「假」，遠嘅唔講，近期《生果報》除咗曾經誣蔑過網媒《港人講地》，老屈《港人講地》有份散播失實資訊，最後要認錯道歉外；《生果報》甚至連奧斯卡得獎者都唔放過，屈人哋支持「香港抗爭者」。關於「淫」，《生果報》除咗試過刊登近乎全裸嘅男女性愛遊戲照片被罰款，其同系雜誌甚至試過連14歲少女嘅「濕身照」都刊登。

我哋成日話，世間一切，皆有因果。《生果報》以至《壹傳媒》多年來誨淫誨盜，難怪有人認為《生果報》一早應該「執笠」；囍雨睇法更加直接，如果有不道德媒體涉嫌觸犯《港區國安法》，可能危害到國家安全，仲想每日散播仇恨、反中亂港？唔好妄想！ 

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk