每逢有媒體人涉嫌違法被捕，坊間一定會謠言滿天飛，如果係支持反對派嘅媒體人被捕，執法部門更肯定會被扣上「打壓」傳媒嘅扣子。噚日，警方國安處採取行動，《生果報》五名董事及總編輯等負責人因涉嫌違反《港區國安法》第29條「串謀勾結外國或者境外勢力危害國家安全罪」被捕，囍雨今日睇《生果報》社評，評論員李平「大大力」地為《生果報》呼冤，包括稱當局打壓《生果報》；用逆向思維去諗件事，係咪《生果報》董事涉嫌違法，警方都唔可以執法呢？

全方位「呼冤」 但站不住陣腳

綜觀《生果報》呢篇題為「你們支持 我們就堅持」嘅「蘋論」，首先稱「當局藉打壓《蘋果》劃出重重新聞紅線、國安紅線，香港新聞自由岌岌可危」，然後又指危害國家安全罪行係「新帽子」，用以隨時隨意打壓傳媒，又質疑如何讓國際社會相信，《港區國安法》無影響大部分市民嘅自由。值得留意嘅係，文章稱《生果報》仝人「定將繼續忠誠地緊守崗位，為迎接黎明來到的時代，奮戰到底」。奮戰到底，係咩意思？繼續反中亂港，甚至繼續踩界？

喺呢度，等囍雨先講講打壓嘅問題，道理好簡單，有人涉嫌違法，警方就要執法，如果因為《生果報》董事等人係「傳媒人」就可以「免責」，咁警方仲可以執法？法律面前，仲係人人平等咩？至於講到《國安法》，其實西方國家包括「五眼聯盟」都有國安法或類似法律，如果外國可以有而中國以至香港特區有就「有問題」，囍雨就真係「諗唔通」喇！

自由 不等於可以違法

事實上，由反對派政客、反對派媒體以至反對派嘅媒體人，都好慣常地高舉自由旗幟，然後攻訐政府部門、執法者「打壓」自由；但大家要諗一諗，自由從來都唔係一個無邊無際嘅概念，例如香港市民有表達、行動自由，但就無自由危害國家安全，呢個道理，好容易明白。最後，對於坊間甚至有法律界人士質疑點解警方連《生果報》2019年嘅文章都審視，質疑《國安法》有追溯力？其實，警方睇《國安法》2020年7月生效前嘅行為，係視乎有人在法例生效後仍持續進行涉嫌犯罪行為，此時之前嘅行為就係佐證，就可以提出起訴。社會上有人借警方嘅調查故弄玄虛，所為何事呢？攻訐警方？定係為涉犯罪者「漂白」抑或轉移視線？ 

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk