壹傳媒近日又成為「新聞主角」，佢旗下嘅《壹週刊》前年刊登藝人張栢芝孻仔嘅出世紙，壹傳媒公司及出版人、《壹週刊》總編輯麥景慶同記者鄭靜，一齊被控違反《私隱條例》。最後兩間公司同總編輯認罪，各罰款4萬元，而記者就要簽保守行為。廣男想講，作為傳媒，為求吸引讀者、谷銷量，不惜違法、走去揭人哋私隱，《壹週刊》仲有新聞道德可言嗎？報道已經曝光，對事主造成嘅影響經已難以彌補，就算之後將報道下架同道歉，其實都係無補於事！

傳媒有責任保護他人私隱

法官喺判案時都有特別提到，兒童嘅出生登記資料唔應該隨意披露，就算事主係女藝人都好，可能生活點滴會引起公眾好奇；但係凡事都要有平衡，公眾人物嘅私隱都應受到保障，傳媒並有責任保護同尊重他人私隱。法官因為被告認罪，又承諾會「引以為誡」，仲有刊登道歉聲明等，所以先以罰款處理。但廣男覺得，壹傳媒旗下嘅媒體，過去已經有唔少「前科」，其實法庭係咪應該加重罰則先啱呢？如果唔係又點樣起到阻嚇作用？

壹傳媒早有「前科」

淨係講最近呢一年壹傳媒多次捲入造假新聞嘅醜聞，例如《蘋果日報》錯引美國機構報告，誣陷網媒《港人講地》「散播失實資訊」；又訛稱奧斯卡獎最佳男配角得主「支持香港示威者」。將啲不實嘅資訊、唔存在嘅嘢，都講到「似層層」咁，最後要公開道歉收場。依家又因刊登藝人兒子嘅出世紙而違法，到底有無尊重過其他人嘅私隱？係咪一早已經將傳媒道德拋諸腦後？咁樣都仲算係傳媒嗎？壹傳媒今次違法被罰，記協主席楊健興回應事件，只係講「罰則不輕，相信有警惕作用」。壹週刊今次「斷正」認罪，仲要罪成被罰款，記協只係輕描淡寫咁批評一句，點解唔嚴正譴責？係咪因為「政治立場」相近，就可以「隻眼開隻眼閉」？有傳媒違法、違規做錯事都要包庇？

作為傳媒，應該要遵守專業操守，報道除咗要真確無誤，仲要確保採訪過程中，最盡減低對他人嘅負面影響。但係，壹傳媒似乎連呢個基本要求都做唔到，繼續不斷踩界，日後隨時會自招惡果。壹傳媒一次又一次犯錯，但係就始終見唔到有改善，有冇需要被整頓一下呢？

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk