規定區議員宣誓嘅《2021年公職（參選及任職）（雜項修訂）條例草案》上月刊憲並生效，據報，特區政府將會喺七月安排區議員逐一宣誓，亦正在擬訂涉及違誓或宣誓無效嘅「負面清單」，參與「民主派初選」、借出辦事處搞初選同簽署「墨落無悔」抗爭派立場聲明書都會被納入「負面清單」，粗略估計，至少有170名區議員會因此被DQ。囍雨對呢個消息嘅睇法好簡單，如果有區議員連擁護《基本法》、效忠特區嘅基本要求都做唔到，咁點可能做特區架構下嘅區議員呢？

羅健熙「榜上有名」？

根據某報章嘅獨家報道，涉及「負面清單」行為嘅區議員眾多，例如民主黨就有52名區議員曾借出議辦作票站，包括主席羅健熙，如果相關人士全數被DQ，民主黨就會剩返大約30個區議員；至於公民黨及新民主同盟，則因為表明以全個政黨名義簽署「墨落無悔」聲明書，估計最終會「滅黨」。另外，民協前主席施德來同前副主席何啟明估計會因為曾參與初選而被DQ，而其署理主席楊彧亦可能因借出議辦被DQ。如果事情係真嘅，簡單嚟講就係一眾「反中亂港」分子，隨時無得留低！

囍雨認為，其實宣誓內容以至一班區議員參選時簽過嘅聲明，要求議員們擁護《基本法》、效忠特區，其實只係好基本嘅要求，今次傳媒所報道嘅三種行為，好明顯係有違相關要求。例如所謂「墨落無悔」聲明書，講到明係要借否決《財政預算案》嚟要脅特區政府；至於參與「初選」，則被認為係一個「集體攬炒」行動，政府如果依法辦事，實屬情理之內。

以「獨口號」作政綱又如何？

按照「負面清單」嘅邏輯，囍雨認為仲可能有更多區議員被DQ，例如喺參選時以「光復香港 時代革命」作政綱嘅區議員，應該如何處理呢？呢句口號，不論依家一班反對派議員如何「包裝」，佢本身嚟自一個「港獨」組織，「獨味」甚濃，難道借辦事處出嚟俾人搞「攬炒」初選嘅區議員要被DQ，但係講到明要「光復香港」嘅區議員就無事？如果標準更為一致，只怕用「光時」口號做政綱嘅區議員，都「唔容易」留低。

2019年底，反對派聲稱自己喺區議員選舉大勝，當時就有人講過，佢哋「只知結果，不知後果」，事情發展到今日，囍雨只能講一句，要玩火，當然要付出代價！ 

圖片來源：羅健熙社交網站專頁

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk