根據政府數字，四月份私人住宅售價指數已經去到390.8點，距離2019年5月嘅歷史高位396.9點，大約只係差1.5%，有從事地產研究嘅人士推測，未來兩個月就會破頂；囍雨睇傳媒報道，新界大圍一個新樓盤，一個一房單位，可以索價超過1,000萬元，一個中產人士想入市而又想過到壓力測試，月入可能要有接近8萬元先得。1,000萬元，買一個一房嘅新界住宅單位，樓價會唔會太癲呢？

不足10%港人能負擔極高樓價

根據傳媒報道同分析，過去十年，雖然香港人嘅收入中位數升咗超過六成，但如果以細單位計算，樓價已經升咗一倍；簡單而言，就係人工升幅，絕對追唔上樓價升幅。同樣值得注意嘅係個別新屋苑嘅成交價，例如喺大圍一個新樓盤，即使係一房單位，都可以索價過1,000萬元，如果有人透過按揭保險計劃借盡八成按揭，以供款30年以及按揭利率2.5%計算，相關人士要過物業壓力測試，可能需要月入7.78萬元。廣男粗略估算，每月供款則要超過3萬元。但根據政府數字，香港月入6萬元以上嘅打工仔，其實得大約9%。換句話說，買得起或者供得起「千萬單位」嘅香港市民，可能連10%都無。

樓價「沒有最高，只有更高」，講真其實都係供應問題，過去一段日子，唔少香港人都因為私樓供應不足、居屋完全「抽唔到」，結果勉強入到市嘅市民都「硬着頭皮」去買私樓，而入唔到市嘅市民，就繼續等，希望樓價回落；但原來經歷過反修運動，甚至遇上新冠疫情，樓價回落完一輪都可以「越升越有」，結果，如果港人要買樓，就要捱「更加」貴嘅樓價。喺樓市呢個零和遊戲，除咗賣樓嘅賺到笑呵呵，就算俾香港人買到樓，唔少都耗盡銀彈，甚至連家人嘅積蓄都要動用，1,000萬元買個一房單位，與其話係「風光嘅樓市」，不如話係香港人嘅哀歌。

全方位覓地 給港人一個家

喺呢個供應不足、樓價破頂同香港人置業難嘅惡性循環下，現屆政府以至社會各持份者要做嘅，應該係拋開己見，為香港人全方位覓地同建屋。最近，全國政協副主席、前特首梁振英就其倡議嘅大欖郊野公園邊陲地興建居屋計劃提出更具體嘅方案，用70公頃嘅郊野公園邊陲地，足夠興建25,000個500呎嘅居屋單位，只收成本價每呎6,000元，而且仲有土地興建低密度老人院舍容納過千退休長者，每位住喺老人院嘅長者可以有獨立房間同洗手間。既然方案可行而且可以快見效，我哋應該團結起嚟，一齊推動一個幫到部分香港人解決住屋困難嘅好方案！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk