關於土地房屋問題，近日喺社會討論得沸沸揚揚，當中尤以全國政協副主席、前特首梁振英提出嘅大欖郊野公園邊陲地興建居屋計劃最為人所關注；今日，梁振英再公開其倡議嘅實則計劃細節，仲有埋圖紙俾市民參考，當中除咗建屋位置以至數量外，仲首次公開當中會有大約3.65公頃土地用以興建可以令「老友記」住得舒適嘅長者住宅。囍雨喺度諗，如果能夠執行有關計劃，不單止係想「上車」嘅香港人受惠，對想喺舒適地方安享安年嘅長者而言，亦係一大福音！

70公頃地建25,000居屋

根據梁振英公開嘅計劃細節，喺大欖郊野公園邊陲地，可以興建25,000個、每個500平方呎嘅居屋單位，而且唔駛用100公頃土地，只需用70公頃；而且另外會預留大約3.65公頃土地用作興建長者住宅，過千個院舍單位，每個老人家都可以有獨立房間、洗手間，喺寬敞嘅空間下安享晚年。至於價錢方面，就如梁振英之前公開所講，每平方呎6,000元，一個500呎單位，即係300萬元，十年內不可轉讓。用一句話概括，就係計劃解決到部分市民嘅置業以及住屋需要。

首先，囍雨必須要講句，如果梁振英只係「紙上談兵」，咁大家無得「討論落去」都好正常，但依家梁振英已經聯同建築師、規劃師、測量師、土木工程師甚至交通工程師，將整個發展嘅圖紙做出嚟，一個清楚俾大家見到而且實行到嘅計劃，係咪值得推行呢？

日後可再發展 給長者寬敞空間

有關倡議嘅一啲好處，其實囍雨之前已經講過，但囍雨認為有必要重複再講，例如300萬元買到500平方呎嘅居屋，呢個係現今一般香港市民能夠負擔得起嘅樓價，同區、相同呎數嘅私人屋苑，可能講緊要700萬元甚至更貴；呢個價錢，對負擔唔起私樓價格嘅市民尤其係年輕夫婦而言，尤其吸引！值得注意嘅係，喺今次倡議嘅實際計劃，有梁振英曾經喺任內最後一份《施政報告》提及郊野公園邊陲地時，講過會研究嘅老人院舍，而今次計劃，係講明建議興建嘅長者住宅，每位老人家都有獨立房間同獨立洗手間，即係唔係剩係搵個「地方」生活，而係給予佢哋一個寬敞嘅退休空間，等佢哋可以舒適地安享晚年。

相關建議嘅好處，講真實在多到令囍雨「不能盡錄」，囍雨仲想請大家留意一點，就係今次計劃嘅選址，係鄰近西鐵站、行車隧道嘅「半熟地」，如果咁都唔發展，係咪好浪費呢？講真，囍雨絕對唔反對其他土地供應嘅建議，但希望大家念及香港市民嘅福祉、唔同人士嘅住屋需求，唔好排除郊野公園邊陲地帶。就好似煮飯咁，係唔需要煲好飯先煮餸，或者菜同牛肉逐樣餸「分開煮」、「慢慢煮」嘅，只要協調得好，好多嘢可以同步進行。重點係，土地房屋問題困擾香港市民多年，我哋要攞出決心及具體計劃，解決問題，不能再拖！ 

圖片來源：梁振英社交網站專頁

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk