以下內容，純為廣男「發夢」時嘅景象，係美好嘅夢，喺度同大家分享，大家祈唔好笑廣男「想太多」：
作為80後嘅廣男，最近同伴侶踏入談婚論嫁嘅階段，結婚，當然唔係「簽張紙」就搞掂嘅問題，當廣男同伴侶家人「商討」結婚大事時，對方嘅家人，就好似「公屋潮文」嘅《公屋 居屋 私樓》嘅人咁，對廣男出身公屋、自己又無物業嘅「背景」諸多質疑，甚至乎問廣男一句，「無樓學咩人結婚？」廣男心諗，唔通廣男要好似吳浩康首《擇日失戀》咁，「人生的悲哀是 當你遇上一個對你很重要的人 但又沒能力留住她」？
好明顯，兩個人嘅關係，已經由愛情、結婚問題，變為一個「無錢無得諗」嘅住屋問題；為咗嘗試「上車」，廣男同家人展開咗無數輪「談判」，但都係傾唔出咩結果，當中原因好簡單，雖然廣男自己有幾十萬元儲蓄，父母工作多年都有啲積蓄，但如果要父母攞出佢哋嘅養老金幫我「上車」，無可能，唔通為咗廣男嘅婚姻，就要佢哋攞埋棺材本出嚟？呢個做法唔單止父母有保留，就連廣男自己，都覺得咁做有啲殘忍。
正當廣男萬念俱灰之際，廣男收到一個同廣男一齊抽居屋嘅好朋友電話，呢位好朋友劈頭第一句就話，「阿男，你中咗呀，掂喇！」廣男當刻心情仲「灰緊」，又唔知佢講緊乜，於是就有啲晦氣咁同呢位朋友講，「我中咗乜呀？風就有得中！」然後呢位朋友再講，「唔係呀，你自己無睇攪珠咩？我同你都有申請個大欖郊野公園居屋，你中咗呀！」果一刻，廣男覺得自己中嘅唔係居屋，而係「六合彩頭獎」！中六合彩呢樣嘢，就算俾你中個二獎，都未必夠錢買樓，只有頭獎，先肯定解決到「住屋」問題！
憑住攪珠結果，憑住廣男將會擁有嘅居屋，廣男挺直腰板，同伴侶嘅家人講，關於住嘅問題，終於解決咗，咁廣男依家係咪「可以娶你個女」呢？伴侶嘅家人，由於知道廣男將會有個安樂窩，所以再無阻止廣男嘅婚事；唯一要求，就係間屋過咗一定年期、許可嘅時候，呢間屋要加上伴侶嘅「名字」，令佢將來多一分保障。
現實生活中，廣男當然未必咁好彩會抽到居屋，但如果現實中大欖郊野公園邊陲地興建居屋嘅倡議可以實施，而其他有住屋困難嘅年輕愛侶可以成功抽中，廣男只能講句，呢個真正解決港人住屋問題嘅計劃，真心係功德無量！
原圖：rthk
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論