對於土地房屋問題，香港各界可以話係眾說紛紜，有人話香港欠缺可發展土地，有人話香港唔係缺地而係欠缺良好嘅規劃，亦有人話「兩者皆不是」，而是香港各界人士以至市民之間欠缺共識。噚日，有立法會議員喺會議上提出關於「全方位增加土地供應」嘅議案，會上唔同議員都促請政府多管齊下增加土地供應，包括發展棕地、發展生態價值較低嘅郊野公園邊陲地等。無錯，香港土地房屋問題嚴峻，與其話優先處理某啲土地選項，最好嘅方法，其實係方方面面、全方位覓地拓地！

須留意郊野公園邊陲地

據傳媒報道，提出議案嘅工聯會立法會議員黃國健指出，郊野公園佔四成，連同農地、荒地同林地等，佔咗香港七成半土地；佢又以新加坡為例子，指出當地嘅自然公園同保育用地只佔約8%，就算計埋水庫用地，都只佔13%，但未曾聽聞新加坡市民嘅生活質素下降，及指責破壞生態環境，相信只要動用呢啲土地時規劃得宜，唔會影響環境同市民生活。

而發展局局長黃緯綸認同要增加土地供應，強調發展郊野公園邊陲地，唔係土地專責小組建議優先處理嘅項目，但「長遠有需要都會研究」云云。囍雨想講，唔係「小組」建議優先處理嘅項目，就唔可以立即研究推行？第一個問題在於，依家房屋尤其係樓價高企問題，香港仲有條件「慢慢做」、「慢慢研究」？第二個問題，喺小組優先建議嘅項目中，唔計填海大約有1,700多公頃嘅「土地選項」，有關「土地選項」例如發展棕地等，有咩大進展？興建到幾多住宅單位？

要急市民所急

囍雨絕對唔反對填海、發展棕地，只係我哋需要嘅，係全方位覓地，而唔係選擇個別「選項」再作打算，而且係應該有具體發展計劃，唔再係原則性討論；以棕地為例，就當政府搵到以百公頃嘅棕地適合建屋，咁啲棕地上面有冇工商業活動？駛唔駛安置相關作業者？如果涉及大型機械，又安唔安置到？又或者講填海，如果最快要十幾年之後先可以入伙，咁香港年輕人要等填海地，咪要等到中年？

囍雨留意到，相關議案最後無喺立法會通過。對於立法會議員之間各有考慮，囍雨無意見，只係如果立法會能夠俾到清晰訊息大家，「社會應該排除萬難、一齊努力覓地，唔會為咗個別選項而放棄全方位覓地」，咁大家話幾好呢？解決土地房屋問題，或者我哋欠缺嘅就係共識與決心！ 

圖片來源：政府網頁

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk