大約十年前，有一位想買樓「上車」嘅年輕朋友，同囍雨傾偈時以「火箭般上升」嚟形容樓價，但呢個世界，「沒有最諷刺，只有更諷刺」，依家睇返十年前，原來當時嘅樓價已經「好平」！今日囍雨睇新聞，睇到一單關於「白居二搶貨 荃青公居屋齊誕樓王」嘅新聞，有荃灣居屋業主帳面賺近380萬元，成為「新居屋賺錢王」。其實，只係幾年時間，一層居屋嘅樓價就升幾百萬，呢個係咩玩法？香港嘅居屋，仲係咪一般香港市民「買得起」？

公屋也是天價

除咗居屋單位，據報青衣某公屋單位，亦由「白居二」買家（「白居二」即免補地價買居屋的非公屋戶買家）以破頂價370萬元買入，呎價超過8,000元，為該區未補地價公屋呎價最高；有地產代表指出，原業主在2015年尾以59萬元買入，持貨不足六年，狂升五倍，帳面「勁賺」311萬元。當公屋幾年之內可以升幾倍，如果樓價再升，可能會變成香港人連公屋都買唔起！

不論係天價「車位」，定係天價嘅公屋、居屋單位，所反映嘅都係深層次嘅土地房屋問題，如果公屋、居屋以及私樓有穩定嘅房屋供應，呢啲住宅單位其實唔會有「天價」、「破頂」，特區政府唔努力去解決土地房屋問題，情況再惡化落去，住房問題，就會變成可能引起騷亂嘅社會問題。

十年太久 只爭朝夕？

可能因為中央出手為香港解決晒啲政治難題，所以近排各界人士都開始討論如何解決以土地房屋為首嘅社會問題，而喺芸芸土地選項中，大家都比較集中討論填海同發展郊野公園邊陲地兩個選項；囍雨認為，填海絕對有必要，而且要加快，不過，填海由落實、規劃、填海到建屋可能需要十幾年甚至更長時間，基層、中產都唔知可唔可以「等得到」！囍雨覺得最好嘅方法，仲係方方面面嘅土地選項都去研究、去做，例如發展大欖郊野公園邊陲地，就係一個絕佳選項。

有地產業界人士分析，私人住宅樓價有機會喺下一季升穿2019年嘅歷史高位，全年樓價升幅可達10%至15%，成交量亦有機會創下九年新高。喺新冠疫情肆虐下，樓價都有望升穿歷史高位，如果喺無疫情嘅情況下，樓價會升到咩地步？香港土地房屋問題當中嘅最大「問題」，或者就係「講咗當做咗」、「俾個願景」市民先！

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk