近日關於房屋而又「熱爆」嘅議題，已經唔係講緊一個住宅單位要幾錢，而係講緊一個車位要幾多錢；有傳媒報道，有公司董事以3,566萬元購入三個山頂豪盤嘅車位，每個平均售價1,188萬元。即係話，一個車位嘅價錢，貴過一般住宅單位，甚至貴過一個細呎數嘅豪宅單位。到底樓市要幾瘋狂，先可以成就到「全球最貴車位」？

從根本解決問題

關於樓價以至其車位價格問題，大家都知道要由土地供應由規劃入手，噚日就有政黨提出方案，建議開發新界以及開發郊野公園邊陲地等建議；相關政黨又指，政府可以重建26條公共屋邨，預料可以提供36萬個單位，並爭取縮短公屋輪候時間至四年，並將人均居住面積由144.2平方呎增加至180平方呎。另外，亦建議加快落實已規劃項目，以增加地積比，加快審批程序等等。按囍雨理解，其實就要全方位覓地，並且加快規劃、審批，解決港人住屋困難。

對於囍雨呢啲凡夫俗子而言，超過1,100萬嘅車位，簡直就係想像唔到嘅事，如果1,188萬一個車位，即係接近1,200萬元，如果可以買到四個住宅單位，大家又點睇？囍雨之前已經講過，全國政協副主席、前特首梁振英倡議喺大欖郊野公園邊陲地興建居屋，以成本價6,000元一呎賣俾香港永久居民；即係假設出售嘅係一個500平方呎嘅單位，售價就係300萬元，呢個價錢，只係山頂「最貴車位」嘅四分之一，大家話抵唔抵？

社會應討論房屋問題

至於有政黨提出土地或者安居計劃，先唔講唔同方案嘅優劣之處，囍雨覺得有一點好重要，就係中央為香港解決暴亂以至政治問題，依家嘅香港，實在應該好似一啲政黨或者從政者咁，專注地為香港解決房屋、民生以至經濟問題；而土地房屋問題，喺香港拖咗咁耐，而且越嚟越嚴重，不論係政府、議員、社會人士以至普羅大眾，應該以行動合力解決土地房屋問題，而且係「講完要做」果隻！

囍雨身邊有唔少朋友，名符其實，車位同單位都買唔起！依家大家睇到嘅，係土地房屋問題，但土地房屋問題搞唔好，就係社會問題，甚至係「計時炸彈」；特區政府以至其他社會人士，不可不察！ 

圖片來源：南豐集團網頁

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk