囍雨小時候喺新市鎮長大，聽家中長輩講，囍雨住嘅地方，正正就係填海地；睇返公開資料，原來香港有接近300萬人係喺有填海嘅新市鎮居住，如果無呢啲新市鎮，香港會點？以百萬計嘅香港人，依家會住喺邊？填海造地，絕對可以一次過為香港提供大量可發展土地；不過，每個土地選項，有利亦有弊，填海造地可能要耗時十幾廿年甚至更長時間，依家身受住房之苦嘅香港市民，等唔等到呢？

新技術可克服填海難題？

之所以再提起填海問題，係因為今日有媒體以大篇幅報道關於填海技術嘅新聞，仲請來專業人士講解，指出填海工程透過海堤設計及用地規劃，可以有效應對極端氣候帶來嘅影響；有關專業人士表明，要解決工程技術問題唔難，最重要嘅係社會要有共識、有決心透過填海增加土地供應。對於專家嘅說話，囍雨絕對同意，只係，囍雨仲有啲擔心同憂慮。

對於極端天氣以至水位上升等問題，囍雨相信以依家嘅填海技術，絕對有能力應付到。但囍雨小心眼啲，就當有最先進嘅填海技術，咁能否保證填海過程或之後，填海地唔會出現不正常嘅沉降？又或者，如果保障到填海地質素，但填海工程受到法律挑戰，甚至官司要打到上終審法院，又點算？如果工程受阻甚至要終止，市民咪又要乾等？

全方位覓地、拓地

長期嘅土地選項，始終都係「長期」，眼前或可見嘅將來，其實短中期土地供應先係重點，囍雨就認為，要等「上車」、「上樓」嘅市民再等十幾年，實在係太耐喇！到底政府以至整個社會有咩方法喺短中期盡量增加土地供應？有人話發展棕地，有人話搞好市區重建，亦有社會人士倡議開發郊野公園邊陲地興建居屋；囍雨認為，以上選項，我哋都應該去諗、去研究甚至實行。今日香港，其實大家都已經無咩條件再「揀擇」，與其喺唔同選項「揀啲嚟做」，最好梗係全部都做啦！

咁喺眾多選項之中，囍雨最支持邊個？老實講，一定係喺大欖郊野公園邊陲地興建居屋，因為發展相關土地，不涉收地、遷拆，而且相關地段附近已經有行車隧道以至港鐵。發展土地，我哋要「易難皆取」，而如果有容易發展嘅土地選項但唔做，咁實在太對唔住香港市民喇！ 

原圖：發展局網誌

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk