近期，社會就六四事件的問題再次鬧到沸沸揚揚，噚日就有新聞，指六四紀念館因為未領有公眾娛樂場所牌照而要暫時閉館，廣男留意到，支聯會秘書蔡耀昌稱「現時社會環境更惡劣，部門執法不講理，法律上亦更嚴峻，只得暫時閉館」；其實，如果違法就係違法，蔡耀昌想講咩理？難道佢哋認為「有理」，就可以漠視法律？
看清相關法例
反對派所講嘅「道理」，係佢哋一方嘅「論述」，但廣男覺得，一切都係講返白紙黑字嘅法律比較好，例如《公眾娛樂場所條例》第四條，就訂明「任何人如無根據該條例批出的牌照，不得經營或使用任何公眾娛樂場所」，而「公眾娛樂」，包括收費或免費嘅展覽或者表演。喺呢個前提底下，如果支聯會嘅紀念館可以開，而其他場所因為「無政治理由」而要閉館，先至係唔公平。
其實紀念館嘅例子，同食環署清拆法輪功嘅宣傳品一樣，都係同一個法律原則，唔理你有咩政治理由，示威好，表達政見好，紀念某件事都好，前提就係要合法；如果過程當中有違法或涉嫌違法嘅行為，執法部門就要執法。廣男講白啲，反對派以至反華派今日「反這個」，明日「反那個」，如果係唔需要遵守法律嘅，咁香港仲需唔需要法律，仲需唔需要法治呢？
參加六四活動？要諗清楚！
另外，廣男留意到，外界近日非常關注關於「紀念」六四嘅「公眾活動」；喺呢度，廣男要提下大家，如果一班人聚埋一齊而且有「相同目的」，有冇犯法值得商榷；更為嚴重嘅問題係，如果一班人扮晒「分開企」實則係同一班人，而又有人高叫可能違反《港區國安法》嘅口號，咁參與六四活動，就可能變成「自投法網」。
坦白啲講句，如果有反對派政客要挑戰法律，呢啲係佢哋嘅事；如果有市民響應或者現身「支持」佢哋，會有咩後果，現階段好難講。大家要諗下，由反修例運動至今，由幾多人因為響應號召而上街，最後變咗悔憾終生嘅「違法達義」。
原圖：rthk
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論