囍雨唔少年輕朋友，都曾經為「上車」（買樓）立下志願，有啲希望30歲前可以置業，有啲就希望結婚生咗第一個小朋友後會有自己嘅物業；近日，囍雨睇到一單新聞，完全顛覆囍雨對於「上車夢」嘅認知，新聞故事嘅主角，係一名80歲嘅伯伯，抽咗近10年居屋，最近終於成功「上車」。囍雨喺度諗，如果佢要等到有填海地嘅居屋先可以「上車」，咪分分鐘要等到100歲？

居屋搶手 伯伯都「吼」

話說，新一期居屋以市價六折定價噚日開售，首日就賣出93個單位，有唔願意透露姓名嘅80歲伯伯，以綠表資格抽咗居屋近10年，今次終於成功升級做業主；呢位伯伯表示，佢同太太住喺鑽石山一間公屋，「好細，好多雜物」，又坦言置業耗盡兩夫妻嘅積蓄，慶幸子女願意幫手供樓，等佢哋「住好啲」，伯伯指自己年輕時無能力，如今有子女幫手「係一種幸福」。

老實講，香港人，上唔到車，或者要等到7、80歲先可以「上車」，絕對係港人哀歌；最令人心痛嘅係，上屆政府明明已經物色到210幅短中期房屋用地，當中96幅已完成改劃或撥作房屋發展，估計共可提供約117,100個住宅單位，點解到咗今屆政府，供應就好似變成「大落後」咁呢？如果講公營房屋，上屆政府搵嘅土地，應該足夠呢幾年興建94,600個公營房屋單位，點解近幾年公營房屋仲會唔夠數？關於房屋短缺嘅問題，實在太多「黑人問號」！

未來供應又如何？

更令人憂慮嘅問題係，到底公營房屋以至私樓未來嘅供應會係點呢？講真，如果要講到填海地或者新發展區嘅住宅單位可以入伙，一般都要十至二十年計，咁相信唔少市民都「好難等」！如果用上述嘅八旬伯伯做例子，咁佢要「上車」，可能真係等到100歲先得。喺呢個情況底下，囍雨希望政府可以考慮一切可行嘅土地選項，當中開發郊野公園邊陲地興建居屋，就係一個好嘅選擇。

事實上，關於開發郊野公園邊陲地嘅建議，有市民支持，有社會人士支持，甚至唔少從政者都非常BUY，一個咁多人支持嘅計劃，政府係咪可以再審重考慮？如果再唔積極啲做嘢，可能將來我哋睇到嘅，就唔係「80歲伯伯上車」嘅故事，而可能係更諷刺嘅房屋「故事」；有啲嘢，其實依家做已經遲，再唔做，社會隨時會亂！ 

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk