因為全國政協副主席、前特首梁振英提出喺大欖郊野公園邊陲地興建居屋，引發咗一輪關於房屋政策嘅辯論；廣男留意到，對於梁振英嘅倡議，有人表示喺2018年土地大辯論時，市民已經「排除」咗呢個選項，廣男就喺度諗，關於開發土地，如果用「點心紙」形式俾人揀，當時啲人當然會揀晒自己偏好嘅土地選項、放棄其他有價值嘅選項，但土地問題如此嚴峻，點解唔係我哋全部都要考慮呢？再者，依家時移勢易，我哋仲要依靠一個幾年前嘅「選擇」去做決定？咁樣做，又對唔對得住要上樓、上車嘅市民呢？
當時市民反對 現在可變歡迎
喺呢度，廣男想舉出一個實例，幾年前，上屆政府全力搵地，甚至不惜背負「盲搶地」、「興建插針樓」嘅攻訐，都堅持「大大小小」、「長期中期短期」嘅土地都搵，幾年過去，一啲當年被指係「插針樓」嘅單位落成，例如位於柴灣漁灣邨嘅新樓，廣男仲見到連反對派議員都「讚好」，稱「整座公屋入伙，是代表著有數百戶家庭，終於可以改善居住環境，有較合理的生活空間。大家在參觀時都為準住戶感到高興」；廣男想問，如果當日上屆政府無堅持，依家呢幾百個家庭會如何呢？唔好忘記，同區嘅「插針樓」，仲有已經變成綠置居嘅蝶翠苑，單單係柴灣，近年已經多咗超過1,600個「插針」單位！
事實上，喺土地問題嚴峻嘅情況下，唔理係填海、郊野公園邊陲地、改變土地用途、開發新發展區等，其實全部都要考慮，當中原因好簡單，因為香港嘅房屋短缺問題，絕對唔係執行「少部分」土地選項就能夠解決。好可惜，上屆政府積極搵地，依家政府就有啲「後勁不繼」嘅感覺。據報，上屆政府搵咗210幅短中期房屋用地，當時改劃好嘅96幅用哋估計可供應近12萬個住宅單位；但今年三月，整體上只改劃好66%，到底當中有咩問題？點解上屆政府雷厲風行，今屆政府就好似「慢呑吞」咁呢？如果呢個情況持續落去，輪候緊公屋、等緊買居屋同埋想買私人樓嘅市民點算？
快找「半生熟」的土地
對於政府或者部分社會人士而言，填海造地或者開發新發展區，係解決房屋問題嘅不二法門，但係，等填海地或者新發展區，可以用上20年甚至30年時間，基層市民根本就無可能等到。故此，廣男認為政府應該全力搵不涉收地、附近有交通配套嘅「半熟地」，當中一個絕佳選擇，就係喺大欖郊野公園邊陲地建屋。廣男唔知道，會唔會有持份者因為「唔係我提出建議，我唔做呢樣嘢」嘅想法，但從政者、管理社會嘅人，職責就係為社會、為市民謀福祉，面對市民嘅住屋難題，香港各界之間實在唔應該分彼此；有啲嘢，唔單止要做，最好就即刻做！
圖片來源：政府新聞處
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論