因為前年10月1日嘅未經批准集結案，一眾反對派被告被判入獄14至18個月，其中單仲偕同蔡耀昌獲判緩刑。據報，「重獲自由」嘅單、蔡二人直言判刑史無前例，「香港已經係變咗，法庭亦都已經變咗」，囍雨想問，如果話法庭變咗，咁係咪因為香港被暴徒破壞多時，不得不變呢？至於話香港變咗，到底係邊個令香港改變？係依法辦事嘅政府，定係煽動抗爭、甚至想推翻政府嘅反對派政客呢？

先從案件背景說起

大家都知道，打從前年6月開始，街頭暴力就越嚟越過分，由最初衝擊慢慢變成襲警、縱火，再演變到後來連無辜市民都唔放過！事發前，不論係警方以至反對派，其實都深知如果再有集會、遊行，可能出現嘅結果，就係遊行集會開始後，暴力破壞行為亦會「隨之而來」；而事實上，當日嘅10.1遊行，的確有示威者堵路、刑事毁壞、襲警甚至縱火等，嚴重影響公眾秩序。喺呢個環境底下，反對派想法庭點輕判組織或者參與未經批准集結嘅政客呢？

囍雨不時強調，用暴力破壞社會嘅暴徒要懲罰，「搭台」俾佢哋衝嘅政客，一樣唔可以饒恕；今次案件，同前年6月9日大遊行、6月12日金鐘集會一樣，都係先由反對派組織或政客「搭台」，然後暴力分子就乘機聚集破壞嘅最佳例子（雖然6.9、6.12遊行集會合法，但暴力衝擊一定非法）。當使用暴力嘅違法份子要受到懲罰，囍雨亦諗唔到理由點解反對派政客呢啲「始作俑者」可以輕判！

一切皆由反對派造成

所以，當反對派政客稱香港變咗或者法庭變咗，囍雨必須指出，香港變，係因為香港俾反對派政客同暴力份子「鍊爆」咗；至於法庭，喺考慮到刑罰阻嚇力嘅時候，亦唔可能再輕判涉案被告！如果再有未經批准嘅遊行、集會引發暴力衝突，而一眾被告「罰款了事」，囍雨想問一句，咁邊有阻嚇力？反對派見狀，仲唔去「以身試法」？

最後，有一點囍雨經常強調，就係遊行、集會涉及暴力，反對派政客就唔可能係「公民抗命」，因為「公民抗命」係唔應該涉及暴力元素；如果反對派政客堅稱自己係「和理非」不涉暴力，而為咗卸責而同「勇武」割席，咁實際上，呢啲政客們都係當勇武派係Condom（安全套）啫！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk