警方噚日發出通知，反對支聯會喺疫情之下，計劃於嚟緊周日舉行六四遊行以及於六四當晚舉辦集會。反對派當然唔憤氣，據報支聯會常委趙恩來就宣稱，自己今年一定會堅持悼念，仲「意有所指」話舊年港人已「自行在全港遍地開花式悼念」，相信「已有足夠智慧以自己方式作悼念」云云。廣男想講，有啲政客自己要「悼念」，係你嘅事，但唔該唔好煽動其他市民墮法網！舊年果場所謂「悼念集會」根本就未經批准，一眾搞手依家判刑嘅判刑、坐監嘅坐監，趙恩來又唔講？！
其實警方今次反對嘅理由好簡單，唔係要「打壓」、亦都同遊行集會「主題」無關，純粹係因為雖然依家疫情數字有所回落，但唔等於疫情已過；尤其依家本港防疫應變級別仍維持最高級別，限聚令亦都仍然生效，公眾地方唔可以多於四人聚集，喺咁嘅情形下，警方難以確保公眾秩序同保護其他市民嘅權利。
存心靠害的遊行集會？
其實疫情之下，全世界好多地方都普遍對大型公眾集會有所限制，英國政府甚至計劃推出法案，賦予警方更多權力管控呢類活動。如果反對派政客係都要用「政治角度」去解讀警方決定，係佢哋嘅事，但首先要搞清楚一點——喺保障社會秩序、公共衛生安全嘅前提下，集會權利唔係絕對，任何人亦都冇特權。
再者，支聯會高舉咗多年嘅所謂「結束一黨專政」綱領，喺《國安法》生效之下，已經被唔少社會聲音質疑有違法之嫌；如果依家仲有政客唔理疫情風險、唔理可能觸犯法律嘅風險，叫市民要「有足夠智慧以自己方式作悼念」，其實係咪有心靠害呢？近期唔少團體都相繼宣布推出支聯會，睇到咁嘅情形，大家都「明咩事」喇，廣男只可以講句，有人如果非要執迷不悟，要踩界，就自己踩吧，但唔好拖其他人「落水」。
反對派咎由自取
至於反對派拋出「以往得、點解今年唔得」之類嘅論調，以圖攻訐政府以至中央時，廣男反而想問下，撇除疫情因素，反對派點解又唔去諗下自己以往做過啲咩呢？經過一場反修例運動，大家都睇清所謂「和平集會」，原來只不過係暴力破壞、打砸搶燒嘅序幕，最後逼到中央忍無可忍要制定《國安法》，一切都係反對派貪勝不知輸、「鍊爆」嘅結果，咎由自取，怪得誰？香港已經被黑衣暴力「攬炒」過一次，又被疫情「攬炒」多次，仲要俾反對派繼續製造事端嘅空間？
原圖：rthk
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論