立法會三讀通過《2021年完善選舉制度（綜合修訂）條例草案》，簡單嚟講，相關立法就係不論係特首選舉以至立法會選舉，都會貫徹「愛國者治港」的精神，之前反對派「攬炒」立法會嘅情況，理論上唔會再出現，受惠嘅絕對係香港市民。不過，但凡係中央、政府嘅立法，當然會受到反對派嘅質疑；例如熱血公民立法會議員鄭松泰，就話參選立法會喺新制度下要喺選舉委員會「五大界別各獲兩張授權票，涉裙帶關係」、「亦可延伸腐敗」云云。借完善選舉制度講到可以「延伸腐敗」？到底鄭松泰係「想得太多」？定係佢自己「有所顧慮」？

如有腐敗 政府可執法

從本質上睇鄭松泰嘅「想法」，包括佢以工程界列明團體為例子，指界別由個人票變為團體票，當中有公司承接政府工程，若「以裙帶關係作選舉門檻，將造成龐大腐敗機制」云云。大家一定要搞清楚，鄭松泰所講嘅，係一個「可能性」，例如「制度改咗，有人有機會 … 」，但廣男必須講，就算係好完善嘅選舉制度，都可能會出現佢講嘅「腐敗」問題，隨舉一例，喺依家選舉制度下，如果有人要「走捷徑」，一樣可以鋌而走險。重點在於，香港嘅選舉相關法例能唔能夠去處理呢啲問題，而香港，勝在有ICAC，如果真係出現任何偏離公平選舉嘅問題，ICAC可以調查、執法，根本唔需要鄭松泰「操心」。

廣男做人比較多心思，見到鄭松泰憂慮日後「上品無寒門，下品無世族」，廣男就喺度諗，鄭松泰其實係咪擔心自己嘅議席多啲呢？例如鄭松泰之後點樣喺唔同界別攞授權票或者提名？又或者，熱血公民曾經標榜自己「本土」、「反共」，鄭松泰又過唔過到資格審查呢？

鄭松泰快點示忠吧！

立法會可容納反對派，大家都贊同呢一點，鄭松泰作為「博士級」人馬，廣男覺得佢與其下下搵「位」批評政府或中央嘅方案，不如佢認真諗下，點樣先可以令人信服鄭松泰係一個「愛國者」呢？以前「本土」、「反共」，當然唔代表依家都係，只不過如果有人係「扮愛國」、「博入閘」，廣男喺度諗，各界別選委們眼睛如此雪亮，未必容易受騙。講到底，能否參選嘅關鍵，都仲係鄭松泰嘅個人造化！

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk