喺香港，除咗房屋問題，貧富不均嘅問題一直都受到社會關注；但其實，貧富不均問題，除咗可以用財富再分配嘅政策處理，以資助房屋幫助有需要人士，都係一個絕佳嘅政策工具。廣男記得，有報道或者報告指出一對收入接近嘅家庭，如果一個家庭係住喺公屋，而另一家庭租私樓住，前者嘅可支配收入會多好多，即係前者嘅「銀根」相對都會鬆動啲。廣男認為，如果將情況套落一個住居屋，而一個租住或者買私樓嘅家庭度，情況亦係類似；所以，當我哋睇貧窮問題時，必須要將住房因素都一併考慮。
買居屋「性價比」高
喺度，先俾廣男舉一個例子，例如有市民以300萬購入抽中嘅居屋，即使只係俾5%首期，以還款年期25年、利率2.5%計算，每個月都只需要供款大約12,700元；相反，如果有市民買嘅係700萬嘅私樓，就算俾20%首期，以還款年期25年、利率2.5%計算，每個月就大約要供25,000元。兩者供款相差12,000多元，住居屋嘅市民可支配收入多啲，生活亦自然輕鬆啲！
有見及此，當早前全國政協副主席、前特首梁振英提出喺大欖郊野公園邊陲地興建居屋，以劃一呎價6,000元賣俾香港市民嘅時候，廣男絕對大力支持，因為就算買一個500平方呎嘅單位，買入價亦只需300萬元，唔單止買入價以至每月供款會平過買私樓，就算以租住私樓嘅價錢去比較，買居屋都抵過租私樓，仲要層樓25年之後係自己嘅。
以新思維看待房屋問題
居屋作為喺香港存在咗幾十年嘅主要房屋措施之一，廣男絕對唔會懷疑佢嘅功用，不過隨住近年嘅樓市變化，香港市民如果抽唔到一手居屋或者「免補地價」嘅白居二，要用市價喺居屋二手市場買居屋，樓價根本同買私樓分別不大；如果政府能夠採用梁振英嘅倡議，搵到地建屋之餘，規定「新居屋」只能原價賣返俾政府，然後政府又以低價賣返俾其他市民，咁樣嘅居屋，先係市民所能負擔嘅房屋。
廣男明白，要改動一個行咗幾十年嘅房屋政策係唔容易，不過，當大家見到房屋問題已經嚴重到連中產都買唔起私樓嘅時候，再唔改變，情況只會繼續惡化。
原圖：RTHK
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論