囍雨噚日翻查《生果報》當初關於「爆眼女」嘅報道時，發現一個有趣問題：喺事發翌日，即係2019年8月12日，《生果報》仲寫緊「眼球爆裂」、「眼眶留下空洞」，但去到同月20日，《生果報》又話「據悉少女右眼暫時能『見到光』」…咁嚴重嘅傷勢，短短數日就好得咁快、可以「見到光」？邊句真邊句假？

咁啱今日再睇新聞，有報道就話，「爆眼女」喺受傷大約三個月之後，佢嘅大頭相就出現喺美國《紐約時報》嘅頭版，相中女子做出以右手遮蓋右眼手勢，不過負責影呢張相嘅攝影師，對於媒體噚日詢問當時係咪得知「爆眼女」嘅傷勢，就未作回應；而《英文虎報》今日亦都有篇報道，話「爆眼女」冇同任何人講自己眼球有破裂，「爆眼女」三個字，只不過係公眾對佢嘅稱呼…囍雨現時關心嘅問題係，其實由頭到尾， 「爆眼女」有冇爆過眼？成件事入面，有冇人串謀隱瞞傷勢真相以及散播謠言？

反對派別轉移視線！

自從有媒體踢爆「爆眼女」去年9月已經「精神飽滿、雙眼炯炯有神」離港後，呢個反修例謊言基本上已經形同幻滅，但一班黃絲黃媒仲喺度試圖「消毒」，有人反咬「你肯定冇視力問題？你肯定係佢本人？」其實用同一個邏輯，大家都可以反問，你又點肯定真係有人「爆眼」？仲有人話，依家係侵犯緊「爆眼女」私隱，「無爆我仲開心」、「唔通好想人哋盲啊？！」…如果係私隱，點解啲反對派媒體當初又要大煲特煲人哋「眼球爆裂、眼眶留下空洞」？咁又唔叫侵犯私隱？更何況，依家問題唔係想邊個「盲」，而係一直以嚟都有人利用、炒作「爆眼女」事件去炮製謊言、煽動仇恨、鼓動暴亂！反對派唔好再兜嚟兜去轉移視線！

《生果報》還要「死撐」？

至於曾經大篇幅「跟進」報道「爆眼女」嘅《生果報》，今日仲喺度帶大家繼續「遊花園」，諸如「外觀上與常人一樣，不代表沒有曾經爆眼」、「只是遠距離看不見」、「可能視力已永久受損」等等。囍雨都係同一個問題：《生果報》係咪造假新聞，依家仲喺度「死撐」？

講真，依家當事人已經離港，成件事幾時先可以還原全部真相，囍雨唔知；但睇番轉頭，大家已知嘅，係有人「受傷」之後就幾乎完全避開公眾視線，甚至意圖阻止警方攞到醫療報告去追查真相；大家亦開始察覺，原來咁耐以嚟，幾乎再冇任何「知情人士」或者「知情醫生」出嚟透露傷者情況。問題係，由「爆眼女」事件而起嘅連串暴動、香港社會所經歷嘅破壞、撕裂，唔通冇人應該承擔責任？今時今日大家重新檢視「爆眼女」事件，新方向應該係，如果有人涉違法，就要追緝到「天涯海角」，如果有媒體煽動暴力仇恨，更加唔可以輕饒！

原圖：網絡截圖、文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk