媒體日前踢爆，被指於前年8月11日尖沙咀暴動期間「爆眼」受傷嘅女示威者，原來喺去年9月已經「雙眼炯炯有神」地笑住去咗台灣。報道一出，全城嘩然，囍雨聽到身邊唔少聲音都話，睇嚟，所謂「爆眼女」事件，根本又係一個徹頭徹尾的反修例謊言。問題嚟喇，咁當日圖文並茂、實牙實齒炒作「爆眼女」事件嘅媒體，係咪有心炮製假新聞？更甚者，喺之後由此衍生嘅連場暴動入面，呢啲媒體又扮演咗咩角色？

《生果報》曾經如是報道

囍雨印象最深刻嘅，係一向與暴力同行嘅《生果報》喺「爆眼女」事件之後，曾經有一連串頗為詳盡嘅「跟進報道」，囍雨喺度想節錄其於前年8月12日，即係「爆眼女」受傷翌日嘅部分報道內容，幫《生果報》立此存照：（以下文字或令人情緒不安）

- 據悉，少女傷勢嚴重，送院時受傷右眼因眼球及組織移位，右眼眶仿如留下一個洞，除眼球爆裂，右眼皮及淚管亦撕裂，在右眼下方的上頜骨整塊全碎。

- 據了解…她整個右眼球爆裂，下眼皮及淚管也撕裂，連眼白後面的鞏膜也爆裂，「裂得好緊要」，晶體也受損，整個傷口撕裂非常嚴重及深入…

- 有知情的醫生直言，少女的傷勢是「極之恐怖及嚴重，與謀殺沒有分別」，他對此十分憤怒。

- 有目擊者在網上憶述，「…護目鏡被打碎，碎片應是直接插穿了眼球……其實女仔擰身過嚟嗰刻，已經看到眼球變咗個血洞」…

綜觀《生果報》嘅連篇報道，囍雨至少睇到兩件事：第一，「爆眼女」傷勢極其嚴重；第二，試圖將責任歸咎警方。但事到如今，當大家睇過當事人「炯炯有神笑瞇瞇」之後，囍雨想問一句，《生果報》寫嘅內容，究竟係點得返嚟？雖然《生果報》用咗唔少「據了解、據悉」以及「目擊者、知情人士」嘅講法，但對於呢啲所謂「消息來源」，《生果報》喺引述之前有冇做過核實工作？作為媒體，如果有啲內容未經求證、核實，就繪聲繪色咁當事實寫出嚟，而且涉及好嚴重嘅指控，《生果報》係唔係造假新聞？！

衍生一場顛覆陰謀？

除此之外，囍雨覺得仲有另一個相當嚴重嘅問題，就係「爆眼女」事件成為之後連場暴力破壞同埋港人仇恨撕裂嘅催化劑，例如前年8.18港島區非法集結、同月喺機場客運大樓嘅大型集會等等，最終都演變成嚴重嘅暴力衝突甚至暴動；喺呢啲事件裡面，有人高叫「香港人報仇」口號，有人宣揚「香港建國」等港獨主張，而《生果報》喺報道相關事件時，亦都用「香港人報仇」字眼作為新聞標題。但依家睇番轉頭，呢啲建基於謊言嘅暴動，本身係咪一個精心策劃嘅顛覆陰謀？而某啲媒體就喺其中「推波助瀾」？

至於「爆眼女」本身，囍雨覺得一直以嚟大家喺關注佢「傷勢」嘅同時，似乎出現咗一個「盲點」，就係當日佢full gear出現喺暴動現場，有冇涉嫌違法甚至參與暴動？事實上前年8月11日，大批暴力示威者喺港九多區「遍地開花」，破壞行動包括「突襲」多間警署，其中尖沙咀警署遭受歷來最嚴重嘅襲擊，暴力示威者除向警署投擲磚頭、硬物及汽油彈，更一度使用類似槍械嘅裝備，事件當中據報至少29人被起訴暴動罪，問題係，當日「爆眼女」受傷之前，又喺現場做過乜、扮演咩角色？點解又好似從來冇人講過？ 

媒體踢爆「爆眼女」離港赴台，可能幫大家揭示咗部分疑團嘅真相，但對於有人係咪涉嫌違法嘅問題，可能依家先至係追查嘅開始…

原圖：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk