作為一個草根階層出身嘅80後，廣男都住過居屋，不過聽家中長輩講，喺80年代中要買一間居屋，只係十幾、廿萬港元嘅事，所以通常上一輩買居屋同分期供樓，好快就可以供斷層樓，手上銀根鬆動啲嘅，甚至一早已經補埋地價，等待他日換私樓時可以補少啲錢。廣男今日睇新聞，就被一單關於居屋嘅新聞「吸引」住，相關標題為《鑽石山居屋王$489萬 可間三房》。五百萬買一間居屋，好似接受到？且慢，呢個價錢，係以市價六折出售，如果要用「市價」買呢間居屋，盛惠大約815萬元。呢個價錢，同買私樓有咩分別？
居屋都有「樓王」
根據相關媒體報道，新一期居屋有超過7,100個單位嘅價單出爐，其中新屋苑「樓王」位於鑽石山啓翔苑高層一單位，502平方呎，售489萬元，據報單位「景觀開揚」。廣男想講，有關單位係以市價六折出售，如果計市價，即係一個489萬元嘅單位，要超過800萬元；換言之，就算假設樓價以至地價等不變，將來有人想喺二手市場以白表價買入相關單位，都相當吃力。當居屋價同私樓價已經「分別不大」時，難怪唔少市民包括年輕人買唔起私樓，甚至連居屋都買唔起。
廣男喺度諗，如果居屋價更加「貼地」，更加符合香港市民嘅購買力，咁會唔會幫到好多香港市民「上車」呢？諗到呢度，廣男又諗起全國政協副主席、前特首梁振英嘅政策倡議，關於梁振英建議喺大欖郊野公園邊陲地興建兩至三萬個居屋單位嘅詳情，廣男就唔喺度重複喇，但有關計劃最注目嘅地方，在於有關居屋單位係以劃一呎價6000元一呎賣俾香港市民，如果市民同樣要買一個500呎嘅單位，只需300萬元埋單。300萬元，相信唔少未「上車」嘅香港市民都買得起，每月供樓嘅錢，分分鐘仲平過租住私樓。
世界在變 房策要變
廣男曾經睇過啲關於房屋嘅書籍，當中講到70、80年代「居屋嘅誕生」，講真，四十年前嘅房屋政策，能夠應付當時嘅房屋需要；但到今日，廣男認為居屋政策係時候要變，好簡單而又重要嘅問題，如果市民根本好難抽到一手居屋，而二手居屋貼近市價，俗啲講就係「天價」，咁市民點買呢？當年嘅房屋「階梯」，由公屋上居屋，再由居屋上私樓，的確係理想，可惜，喺今日已經「行唔通」。
圖片來源：政府網頁
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論