執筆之時，本港已經連續26日冇錄得源頭不明本地個案（連續第5日零本地確診），廣男睇新聞，有醫生就指，如連續28日都「冇事」，相信已達致清零目標，可與內地商討通關事宜。公務員事務局長聶德權日前亦表示，香港依家「有望清零」；而立法會議員李慧琼就促港府盡快與內地及澳門商討，俾已經打疫苗嘅市民先通關。
種種跡象睇嚟，香港抗疫似乎真係見到「曙光」，講真，廣男都希望快啲有得通關、出遊，但眼前有個好現實嘅問題，依家變種病毒咁犀利、輸入個案又未斷尾，大家點知香港唔會再爆新疫情？通關，真係「話咁易」？
香港距群體免疫仍很遠
喺呢度，廣男想先同大家講少少台灣嘅例子。台灣之前嘅抗疫成績，一度被譽為「模範生」，由舊年4月開始，更一度創下連續253日冇本土病例嘅記錄，但係近期一個華航機組人員感染群組，就幾乎令到之前嘅所有努力「一夜清零」，島內更加已經連續5日單日確診破200宗。講到爆疫原因，民眾防疫意識有所鬆懈，係一原因；但廣男覺得，最大嘅問題在於，台灣錯過咗喺疫情受控期，把握時間普及疫苗接種，民眾根本唔夠防護力，所以就算一個小小嘅漏洞，都足以造成疫情幾何式爆發。
台灣依家嘅疫苗接種率大約只得1%，香港又點？據聶德權透露，現時本港有120萬市民已經打針，佔16歲以上人口約18%。廣男無意攞台灣同香港嘅「數字」嚟作比較，問題嘅關鍵在於，無論香港「多幾多倍」，都距離達至群體免疫效果仲有好大一段距離。咁返番上文提出嘅問題，有變種病毒、輸入個案之下，大家點知香港唔會再爆疫情？呢種警號未解除，又叫其他地方點「放心」同香港全面恢復通關？
越是清零在望 越應快打疫苗
廣男好明白，好多市民都想快啲「唔使隔離」出遊、探親，但廣男亦都相信，冇人希望見到只係「一時嘅清零、一時嘅通關」。好似星港「旅遊氣泡」咁，兩次都係眼見就嚟成行，結果臨門一腳「撻Q」，廣男喺度諗，如果通關又好似咁「曇花一現」，個意義喺邊？
以往嘅經驗話俾我哋知，每當見到「清零在望」之時，亦都可能正正係大家防疫意識最鬆懈、最有可能引爆新一波疫情嘅時候，廣男覺得，如果大家想「可持續地、唔使隔離地」出行，一方面，外防輸入要繼續做好；另一方面，大家要盡快接種疫苗，唔好再等再觀望。只有當足夠多嘅市民打疫苗，令香港有群體免疫，我哋嘅保護力先唔會「脆弱」，有咗呢啲條件，其他地方自然樂意、放心同香港通關。
原圖：rthk
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論