唔知大家會唔會同廣男一樣，好多時候都幾享受獨處嘅時間：睇下書、煲下劇、聽下音樂…一個人都可以好舒服、好盡興。但你有冇聽過，有人坐監都可以「盡興」？
話說社民連主席黃浩銘日前去到荔枝角收押所，探望涉前年十一非法集結案而要還押候判嘅黨友陳皓桓。廣男今日睇新聞，黃浩銘事後就形容陳精神唔錯、還押期間不斷做運動、做掌上壓消磨時間，又「教咗佢幾招，希望佢健健康康」，仲話喺監獄之內，「一個人原來都可以盡興」。廣男唔知呢句話，係咪陳皓桓嘅真實感受，不過既然講到咁「寫意」，廣男只可以講，咁坐監，又「有咩好怕」喎！
「享受」？還是死頂？
反修例運動以嚟，相信大家聽過唔少反對派政客類似「坐監如放假」嘅歪論，廣男印象所及，有人就話喺獄中多咗時間睇書，仲話如果唔係「入咗嚟」，都無可能「睇咁多」；有人就講過自己喺獄中寫歌、閱讀以及「每天做運動」keep fit，好喇，依家又有所謂「一個人原來都可以盡興」論，其實，究竟意欲何為呢？廣男睇落，似乎係有人刻意想淡化坐監、還押之苦，甚至有美化監倉生活嘅意味，想等啲「抗爭者」錯誤以為坐監嘅滋味「其實未必咁差」，但實情又係點？政客真係享受坐監、定喺度死頂？
廣男最記得，曾經標榜自己「越打壓、越頑強」嘅前公民黨人，亦都有人講過「案底令人生更精彩」，不過一旦當佢哋自己成為「階下囚」，又退黨又寫公開信呼籲公民黨「解散」，當中有幾句話係咁講：「坦白說，無論在人前表現得多樂觀堅強，身陷囹圄必然不會好受。午夜夢迴，每當想起家中老少，總不能自已」、「只有真正進來才會知道，做好坐監的準備這個想法，是多麼沉重」…好明顯，佢哋肯定唔認為坐監係一件可以「好盡興」嘅事，亦都唔係「做下運動睇下書」就可以輕輕鬆鬆「當放假」。
別講得如此輕描淡寫
所以廣男想講，有啲政客想死頂，係佢自己嘅事，但唔該唔好將坐監嘅煎熬描繪得咁輕描淡寫；美化坐監、發放錯誤訊息，隨時可能荼毒到其他年輕人。其實調番轉頭，廣男覺得學校、家長、以至全社會，真係要正視政客歪理對學生、青少年嘅影響，雖然依家「明刀明槍」嘅暴力事件基本絕跡，但有啲媒體、反對派政客，依然冇停止過煽動人去抗爭或者違法，保護年輕人，首先就要令佢哋遠離歪理。
其實，如果坐監真係可以咁「盡興」，啲反對派政客點解又要咁積極嘅搞上訴、搞保釋？夜闌人靜、鐵窗之下，係因為佢哋自己都覺得好悲哀吧！
原圖：rthk
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論