經歷過違法佔領、旺角暴動以至反修例運動，囍雨認為，反對派政客講嘅嘢，基本上已無道理可言，明明犯罪，又話俾人打壓；明明話遊行、集會係「權利」，到被檢控時，又願意認罪喎！近日，關於前年10月1日嘅未經批准集結案，壹傳媒創辦人黎智英等十名反對派人士被檢控，結果出乎意料，全部被告認罪！睇返《生果報》嘅報道標題，題為〈堅持遊行實踐《基本法》權利 認10.1集結 十泛民5.28判刑〉，囍雨想問，既然堅持「實踐」權利，點解又要認罪呢？兩者無矛盾咩？
犯法就是犯法
案件起源，在於一眾被告明知警方唔批准搞遊行，但佢哋執意為之，甚至煽動市民參與。睇返反對派喉舌《生果報》嘅報道，提到案情時見到唔少反對派嘅歪理，例如民陣嘅陳皓桓曾自言「很大機會被捕，但仍會選擇公民抗命，又指雖然有法律風險，但『人多先安全，先保障到大家』」；梁國雄同李卓人則「鼓勵公眾實踐《基本法》保障的公民權利，加入遊行隊伍」。又公民抗命，又實踐《基本法》權利，但大家要諗下，《基本法》講嘅權利，包唔包括未經批准嘅不合法集結呢？
坦白講，前年10月，正值反修例運動嘅「高峰」，亦即係暴徒暴力「最猖狂」之時，喺呢個前提底下，警方仲有咩可能批准反對派政客搞遊行或者集會？而事實亦都證明，當日嘅不合法遊行，的確有暴力事件發生，有暴徒堵路，甚至有人掟汽油彈同縱火。囍雨想同陳皓桓等人士商榷下，所謂公民抗命，理應係堅守非暴力原則嘅，請問示威、反政府人士如何「掟住汽油彈嚟公民抗命」呢？
政客沒有違法權利
相對起其他嚴重嘅反修例案件，呢單反對派頭頭嘅未經批准集結案似乎「更受關注」，囍雨認為大家留意呢單案，除咗要認清反對派嘅歪理外，最緊要知道香港係法治社會，任何人違法，包括以為自己「惡晒」嘅反對派政客犯法，都要接受法律嘅制裁。今次案件，首先違法，繼而有人堵路，甚至出現非常暴力嘅違法行為，反對派政客為暴力分子搭台，算唔算係罪加一等？近期，唔少關於未經批准集結嘅案件都好似「判重咗」，囍雨認為，治亂世，就要用重典，反對派政客以至其他反政府人士，要怪只能怪自己心存僥倖，以為犯法「唔一定有事」！
圖片來源：RTHK
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論