日前深水埗區議會四個反對派議員，將會議室當「酒吧」、公然邊開會邊飲酒，引起全城關注。廣男上次就同大家講過，問題嘅關鍵，係呢班反對派議員嘅言行舉止，令到區議會禮崩樂壞、形象受損，當然更加辜負市民期望。可能眼見事情越鬧越大，廣男見到涉事者之一、民協嘅何啟明日前就出咗封道歉信，並「謹此宣誓，以後在會議上不再飲酒」。廣男想講，即係做錯事、道個歉，就當了咗件事？點解唔係引咎辭職？
所謂解釋 不成理由
按照何啟明嘅解釋，當日飲酒係因為覺得果次大會，應該係「最後一次最齊人」嘅會議，所以抱住「長平相送」嘅心情為同事「餞行」，又話希望公眾體諒佢嘅「原意」並非唔尊重議會，而係「對同事離別表達心意之舉」等等…對於呢啲解釋，唔知大家點睇，反正廣男就唔多接受喇；呢啲「理由」，根本不成理由！
其實個道理好簡單，好多事情，要分時間、地點、同場合；區議會場地，係一個嚴肅、莊重嘅場合，尤其會議進行期間，區議員係履行緊自己職務。無論何啟明等人嘅「原意」係點，實質做出嚟嘅舉止，客觀效果就係冇尊重區議會呢個場合，亦都冇尊重自己作為區議員嘅身份。大家諗下，如果個個要「送別同事」，就不顧禮儀、不尊重場合，仲成世界嘅？呢種歪理如果「推而廣之」，醫生係咪可以「摸住杯底」當值？警員係咪可以一邊執勤一邊飲酒？
香港不需要這種區議員！
仲有，如果公然要飲酒，廣男想講，咁佢哋喺議會落敗嘅人，卸任之時係咪又要喺會議室開番個Party或者「狂野派對」？所以話，呢個唔係大家「理唔理解」嘅問題，講真，「長平相送」嘅心情，邊個唔知？依家嘅問題係，有人喺一個錯誤嘅時間、錯誤嘅場合、做一件錯誤嘅事情啊嘛；如果一句「sorry」就輕率了事，廣男又想問下，咁以後再有同類事件，係咪又可以一樣等於「冇後果」？
要飲酒，可以；要餞行，冇問題，唔該辭職、返屋企、慢慢飲，冇人阻你，但唔該唔好攞議會嘅形象嚟敗壞，香港唔需要呢種「區議員」！
原圖：劉佩玉提供、何啟明fb
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論