囍雨作為一個居住喺新界西嘅人，經常搭巴士經大欖隧道往返九龍以至港島。每當囍雨搭車經過錦田一帶，尤其係臨近大欖隧道嘅路段時，不時都會好奇地諗，咁大塊地，附近又有隧道同西鐵站，唔開發一帶土地用嚟興建公營房屋，會唔會有啲浪費呢？上網睇返相關新聞，上屆政府以至一啲社會人士，原來幾年前已經倡議過發展附近嘅郊野公園邊陲地帶，可惜研究計劃被中止。今日，囍雨睇到全國政協副主席梁振英又再提起相關計劃，而且提出用嶄新思維喺附近發展居屋，囍雨認為，如果相關計劃得到落實，至少可以解決兩至三萬個家庭嘅居住問題。

6,000元一呎 300萬一層樓

梁振英嘅倡議，囍雨可以用一個段落去解釋。簡單嚟講，就係用唔超過100公頃嘅大欖郊野公園嘅邊陲地帶，興建兩萬至三萬個居屋單位，定價原則係唔收地價，只收開發土地同建築成本，政府庫房唔會有損失；以實用面積計算，每平方呎劃一呎價係6,000元，即係一個500呎嘅單位，只需300萬元。對象係香港永久居民，無物業就申請得，抽籤方法亦唔再區分公屋同非公屋居民；入伙後十年內必須係業主自住，如果要出售，只可以原價回售俾政府。呢個倡議，唔單止吸引，而且售價完全係一般年輕人嘅負擔範圍之內。

對於呢個倡議，囍雨覺得有幾點值得注意，首先梁振英建議發展嘅土地，唔需要用上十年或以上嘅時間去規劃同建造，因為以該地附近嘅配套而言，就算唔係熟地，都算係「半熟地」；其二，就係建議嘅定價，係喺一般市民嘅負擔範圍以內，甚至收入較高嘅公屋戶都可以負擔到。第三，就係建議嘅建築期，唔駛等十年八載，而係預計用三年時間去做，依家普通市民買樓花，都可能要等一年以上時間。

起拋磚引玉之用

今次梁振英提出嶄新嘅發展居屋計劃，囍雨認為可行之餘，仲起到一個好重要嘅作用，就係社會見到政治問題開始得到解決，大家都可以多為民生議題尤其係房屋問題發聲，今日梁振英提出一個方案，他日其他社會人士又可以提出不同建議，重要嘅係大家都願意放低政治爭拗，專心解決土地房屋呢個「老大難」問題。最後，囍雨喺度諗，如果一個300萬元嘅單位有囍雨份，真係開心過升職、加人工！ 

圖片來源：大欖隧道社交網頁專頁

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk