前幾日，囍雨去港島東區睇牙醫，離開時搭車經過柴灣一幢較新落成嘅公屋；如果囍雨無記錯嘅話，呢幢公屋連同其他新興建嘅單幢樓，曾經被社會狠批為「插針樓」，上屆政府甚至因此被批評為「盲搶地」。但好奇怪，呢幢公屋興建好之後，囍雨上網睇到有反對派區議員表示「整座公屋入伙，是代表著有數百戶家庭，終於可以改善居住環境，有較合理的生活空間」… 其實，政府搵到多啲地起樓，尤其係興建公營房屋，最終受益嘅一定係市民。今日香港開始解決好政治問題，又喺度談論房屋問題時，囍雨必須講句，有為嘅政府，「搶地是常識」吧！

覓地建屋 令人憂慮？

近日，有媒體有篇題為《過渡房屋達標存疑 覓地建屋令人憂慮》，尾段有句說話，非常值得深思，囍雨喺度同大家分享下：

「既然政府對作為短期措施的過渡性房屋供應也都採取如斯應對態度，那在長遠覓地建屋一事上自然更讓人擔心，早前政府所謂成功覓得330公頃在未來十年興建31.6萬公營房屋單位，會否也跟過渡性房屋一樣有同類問題？」

對於土地房屋呢個「老大難」問題，其實大家都知道，係土地問題，如果無足夠土地興建房屋，其他嘢根本「無從說起」。囍雨留意到，近年大家都喺度討論填海、棕地、郊野公園邊陲地帶甚至問中央「借地」等選項，囍雨覺得，對於開拓土地，絕對唔係A、B、C、D或E嘅問題，而係ABCDE都要去做；如果我哋只側重某一個土地選項，而呢個選項土地不足或者發展受到阻滯嘅時候，土地供應又會「大落後」，到時樓價更貴，市民怨氣就更深。

短期措施也很重要

值得一提嘅係，近期有新聞報道，質疑政府透過興建過渡性房屋、提供租金津貼等「先解決燃眉之急」，但就似乎都係「得個講字」，部分工作進度仍然較為緩慢。坦白講，如果一啲短期或者過渡措施，實行起上嚟又要一年、兩年甚至更長時間去做，咁可能已經起唔到「解燃眉之急」嘅作用！囍雨唔係話要政府再不斷搵地方興建所謂嘅「插針樓」，但係急市民所急，乃係政府責任。

自港英時代起，我哋睇到政府對研究、開發土地同興建房屋已經有一套「行之有效」嘅機制，但時代唔同喇，要回應今日嘅社會訴求，政府就需要變招；否則，今日輪候公屋嘅基層要等五年多，將來可能要等十年！但人生，有幾多個十年呢？ 

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk