中國上星期宣布無限期暫停同澳洲戰略經濟對話機制下嘅一切活動，廣男見到《生果報》今日對此寫咗篇題為「比戰狼更兇殘的戳瞎外交」嘅評論文章，主旨意思大概係想講中國依家「逮住澳洲作為戳瞎斷指、威懾對手的對象，以突破五眼聯盟或七國集團對中國的圍毆」，廣男睇完成篇嘅感覺係，外國勢力聯手圍攻中國，《生果報》反而講到好似係中國有錯咁喎？！
從《生果報》嘅「視角」睇國家，永遠只會睇到國家如何「唔好」；明明外國勢力聯手搞中國，明明中國被迫採取外交反制，但喺《生果報》筆下，就變成中國「要逮着一個往死裏打，打到他沒有還手之力，既有效削弱對方力量，也可震懾其同伴」、「是戰狼外交的升級版，更兇殘、更具街頭打群架色彩」，即係將中國嘅外交策略形容到好似「街頭混混打群架」咁，又粗鄙又唔講道理？廣男首先想問，對於無論「五眼」定係G7（七國集團），佢哋如何無理打壓中國在先，《生果報》又唔講下？
中國「不還手」才是「對的」？
如果大家真係擺事實、講道理，廣男相信心水清嘅人都睇得到，就算依家中國同某個、或者某啲西方國家「關係轉差」，最根本嘅問題，其實在於呢啲西方勢力一而再、再而三粗暴干涉中國內政，繼而抹黑、打壓中國。就以香港問題為例，無論五眼聯盟以至G7國家，幾乎從來不問暴徒暴力，只會一味批評執法的政府、以及立法止暴制亂的中央。廣男想講，呢啲「己所不欲」嘅嘢，佢哋反而強行加諸中國身上，究竟邊個「粗鄙、撩交打」、唔講道理呢？套用《生果報》嘅邏輯，中國被人圍攻，唔還手唔反制任人欺凌「才是對的」？
舊思維舊套路 要變一變了！
至於《生果報》講到中國嘅「外交策略」係咪真係可以令澳洲「服軟」、「能否威懾五眼聯盟和G7、能否再次超越西方300年國際關係理論」等等，廣男又要講句，此言實在差矣！任何國家都有和平崛起嘅權利，中國如今崛起，靠嘅唔係欺凌或者要其他國家「服軟」，而係過去幾十年嚟一直專心做好自己嘅事、搞好自己嘅發展，講真，如果中國都好似某啲西方國家咁，一有「不合己意」就今日撩下呢個、聽日打下果個，全世界到處「點火頭」，廣男相信中國唔會有今日咁嘅發展成就。
世界，係一路向前發展緊嘅；尤其今時今日好多西方國家都自顧不暇，點解唔認真諗下，與其打壓中國，何不參考下中國嘅成功經驗？靠打壓對方保自己地位果一套，已經「不合時宜」了。至於《生果報》，廣男只可以講，佢哋果套「思維模式」，都係時候「變一變」吧…
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論