相信大家都知道，依家香港法例有規定，任何人只要身處公眾地方，就必須一直佩戴口罩；如果你問囍雨，講真，囍雨梗係希望快啲有得除口罩過正常生活喇，尤其大熱天時，的確又焗又唔方便。但依家實情就係，香港疫情未過，隨處都可能潛藏爆疫危機，大家戴番個口罩，既係為己、更係為人。

不過呢個咁淺白嘅道理，就偏偏有反對派區議員當睇唔到，仲要「唱反調、對著幹」，日前西貢區議員葉子祈就被揭發，搭巴士期間一度除低口罩，更聲大夾惡，連篇歪理同勸阻佢嘅同車乘客口角。囍雨嘅睇法好簡單，只要事件查證屬實，咁既然有法可依，一般人違法要罰，議員違法就更加要罰！

「斷正」還要歪理多多？

囍雨由網上瘋傳嘅影片所見，一位冇戴口罩、疑似葉子祈嘅年輕男子，當時企喺巴士梯間，與多名乘客發生爭執：「我冇講過任何嘢呀？我有冇周圍噴口水，惡意做違反公眾衛生嘅行為呀？」、「我响度有冇傳染病菌呀，你有冇證明到我係一定確診呀？」、「冇戴口罩出街一定犯法有病？」…而有消息就指，事發時曾經有乘客向該名男子提供新口罩，但佢冇理會，拒絕配合；而事後葉子祈接受媒體訪問，亦都承認因口罩問題同人爭執，仲大條道理話「我除咗（口罩）一陣，焗所以除」。

「焗」，就可以喺公眾地方隨意除口罩？「冇講過任何嘢、冇周圍噴口水」，就可以唔遵守法例？囍雨想講，呢個唔單止係有人涉違口罩令嘅「小問題」，更加係涉及公共衛生的大問題！今日你一句「焗」，話除就除；聽日佢又一句「我又冇周圍噴口水」，又隨意唔戴口罩，如果個個都恃住呢種歪理貪圖自己方便、舒服，咁法例豈非一紙空文？更重要嘅係，依家疫情未斷尾，社區仲可能存在變種病毒傳播鏈，如果因此造成新一輪傳播、新一波爆發，香港豈非又要被疫情「攬炒」多次？！睇下依家印度嘅處境，仲未夠觸目驚心？大家係咪非要去到果種惡劣地步，先識醒、識驚？

涉違口罩令的「慣犯」？

另一個令囍雨覺得真心嬲嘅地方，係原來葉子祈已經唔係第一次喺公眾地方唔戴口罩，據報去年9月，佢就曾喺西貢區議會會議期間唔戴口罩，以至一度同其他議員發生爭執；今年2月，佢於維景灣畔派發利是封時，又被人揭發公然唔戴口罩。囍雨想講，對於一個屢次涉違口罩令嘅「慣犯」，尤其「斷正」仲要諸多歪理嘅區議員，既然法例當前，又「有圖有片有線索」，當局以至執法部門必須依法追查、予以懲處，一來，防止社會出現「點解佢得我唔得」嘅跟風效應，二來，再次告誡反對派，法律面前，政客唔係大晒、有特權！

原圖：網片截圖、葉子祈fb

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk