先考大家幾條中學程度嘅歷史題：

A：解釋香港經濟的特色及推論1930年代香港和內地的關係；

B：解釋1990年代中國社會主義現代化及經濟現代化的特色，及推動經濟現代化的因素；

C：分析1971至97年間香港在亞太地區擔當的社會、經濟及文化特色。

以上三條，係今年中學文憑試歷史科嘅部分考題，廣男想問大家，你識答幾條？如果唔識答、或者答得唔夠好，唔係因為題目難，而係你水平差，因為根據前任考評局評核發展部經理楊穎宇嘅講法，呢啲題目「淺到一個點」。

又潑文憑試污水？

楊穎宇何許人也？冇錯，就係果位喺佢任內出現「1900-1945年間，日本為中國帶的來利多於弊？」考題嘅考評局前人員。喺佢眼中，今年嘅出題者「好唔掂」，試題「異常地淺」、「缺乏讓學生展現能力的空間，將令太多人取得高分」；同佢有相近睇法嘅，仲有教協理事、歷史科教師張往，佢形容有啲題目嘅問法，係「倒退二、三十年」，反而「較重要的政治發展卻沒有出題」。其實，廣男反而想先問下，佢哋究竟係從教育角度出發、定係基於政治立場發表意見呢？又想潑文憑試污水？

老實講，廣男冇睇過上述試題所附嘅參考資料，亦都唔知道今年嘅考生係咪亦都覺得「淺到一個點」，但令人唔理解嘅係，少咗所謂政治敏感題目，係咪就等於「淺白」、「好唔掂」或者「倒退」呢？就例如「推論1930年代香港和內地的關係」、分析「香港在亞太地區擔當的社會、經濟及文化特色」，單睇字面，廣男覺得其實好考學生嘅歷史基本功同分析、論述能力，想答得好或者攞高分，真係咁容易？

少了考政治就是「倒退」？

仲有，我哋講開歷史或者歷史科，所謂「政治重要」，廣男認為好多時係出於某部分人嘅「刻板印象」，但就往往似乎忽略咗經濟問題先係重點，就如馬克思主義中嘅底層結構，其實亦都係講緊經濟一樣。廣男想講，如果有啲人覺得考「經濟問題」多咗、冇俾機會考生「講多啲」政治就係「倒退」，咁其實呢啲人本身係咪政治病上腦呢？

廣男總覺得，考試嘅目的，在於檢驗學生嘅學、同老師嘅教；而教育嘅重點，應該係培養學生有正確嘅認知，香港教育過往嘅種種積弊，好大程度上就係因為受到太多政治化、激進化嘅影響，如今香港社會要回復正軌，教育更加係重要一環，校園之內、公開考試亦一樣。

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk