廣男上次同大家提到涉違《國安法》後潛逃英倫、人稱「攬炒巴」嘅劉祖迪，講到佢宣布正式告別測量師生涯、全力投入抗爭，兼開專頁接受大家訂閱同捐款；即係講到尾、又係錢。咁講完錢，當然假假地都要「做番啲嘢」，所以嚟到今日呢篇續集，廣男就同大家講下，攬炒巴近日就聲稱，將聯同15國「手足」，喺嚟緊下個月搞一場「6.12全球聲援香港」集會。吹到咁大，大家不妨同廣男一齊睇落去，睇下到最後，佢會唔會又係搞活動為名、吸捐款為實？

係威係勢的「全球集會」？

呢個係威係勢嘅「聲援集會」，究竟點「全球」法？攬炒巴就宣稱，「有來自15個國家的手足聯合發起『6.12 黑夜維城 星光照夜・全球聲援香港』計劃」，仲話會邀請「維吾爾、西藏人等受壓迫民族」出席活動；至於以咩形式舉辦，佢就講得好有「技巧」，話疫情之下，「可能不限於實體集會，也可能是展覽、網上研討會等」。大家點睇？係咪講到好有「彈性」咧…

廣男就喺度諗，如果有人到時求其搞搞「線上活動」、又或者連線宣洩下「政治意見」、嗌幾句抗爭口號就當「全球集會」甚至為自己籌到錢，咁又真係「本小利大風險低」，之但係，咁嘅「聲援、抗爭」、意義係邊？難怪有啲網友、「手足」好直接話，喺香港本地搞，都話叫做「有些少意義」；但喺海外，除咗有人「博上鏡」之外，都唔知有咩用？！廣男又覺得，大家唔好睇小呢樣嘢，對於有啲人，可能搞唔搞得成攬炒唔重要、而係想「攬鈔（票）」，咁呢啲「活動」就分分鐘好「有用」，至於「抗爭」，一個好聽啲嘅「講法」啫！

走佬政客的「搵錢方程式」？

對於走佬政客嘅呢啲「搵錢方程式」，講真，過去一段時間以嚟，大家可能已經見慣不怪，廣男只係覺得，令人唏噓嘅，係果班留低嘅「手足」，曾經所謂嘅齊上齊落，結果就係有啲人喺香港被捕、被告，甚至承擔法律責任；有啲人，就喺外國風流快活、一門心思想方法「吸錢」，真係幾時都「冇得輸」！

講完攬炒巴（係咪應該改稱「攬鈔吧」呢）嘅故仔，廣男突然諗起多年前一套笑片嘅對白：「嗱，其實啲錢就唔係我袋，係捐俾萬千苦難嘅同胞」，仲有一句大家耳熟能詳嘅警方勸諭：「騙徒手法層出不窮」…

原圖：攬炒巴fb

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk