香港大學早前發聲明，宣布停止代港大學生會收會費、提供財務管理服務，甚至表明收回其會址同其他設施嘅管理權；當中原因，就如校方聲明所指，學生會近年行事日趨政治化，包括「公開發表煽動性並可能涉及違法的言論」。對於呢件事，外界嘅反應可謂非常兩極，認為港大學生會踩界嘅人士，極度支持校方做法；支持學生會嘅，就批評港大校方「割席」。日前，港大學生會前外務副會長周永康寫咗篇文，評論「港大學生會被割席」一事，廣男睇過相關文章，只能夠講句，「處處歪理」！

學生為何坐牢、流亡？

周永康呢篇題為《港大學生會被割席 記港大十年變化》，所攻擊嘅當然係政府或者港大校方，例如佢提到學生被捕或涉違法嘅問題，就形容狀況為「禁錮、毆打、收監學生何其平常，年輕人或坐牢或流亡或出走」；關於港大校方，就指「港大今天的聲明，誰人意外？以國家之名行諸的政治暴力，施加的精神傷害，自綁的恐懼法則，豈不越來越司空見慣」；文章尾段，佢就表示「粉骨碎身全不怕，要留清白在人間」，叫人「站穩陣腳，看穿政權的虛妄」。恕廣男得罪講句，所謂「粉骨碎身全不怕」，如果學生們聽咗而抱住呢種心態行事，最後會唔會變成「攬炒」自己呢？

先講所謂學生被「禁錮、毆打、收監」問題，廣男想問下周永康，點解學生會被收監？有學生被收監或坐監，因為佢哋被捕；佢哋被捕，係因為佢哋涉嫌違法；周永康論「果」而忽略「因」，道理上講得通咩？至於年輕人「流亡」，廣男又係果一句，如果無涉嫌違法，又何須「流亡」呢？

港大校方 必須作為

可能喺年輕嘅「港大人」眼中，港大校方嘅聲明可能係同學生會「割席」，但廣男就有唔同睇法，港大校方愛之深、責之切，絕對無可能眼見學生會代表「踩界」而不作為；隨便舉兩例子，港大學生會早前先發聲明批評中央完善香港選舉制度，繼而質疑喺大學推行國安教育，如果佢哋「越踩越深」，有一日觸碰到法律底線，係咪要港大校方到時「睇住」佢哋俾人拉？周永康說得輕鬆，但大家可以反問周永康，佢係咪想佢嘅師弟、師妹「出事」先？

最後，周永康一句「粉骨碎身全不怕，要留清白在人間」，講得非常有氣勢，只係現實係另一回事。如果有學生會代表涉嫌觸犯《港區國安法》，刑責絕對係唔講得笑。喺呢度，廣男覺得不論係港大校友定係其他社會人士，都唔應該再鼓勵港大學生會代表或者「種大佢哋個膽」，而應該站喺一個理性嘅位置，勸佢哋快啲收手！ 

圖片來源：周永康社交網站專頁

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk