本身係資深大律師嘅李柱銘及大律師吳靄儀，因涉前年「8.18」非法集結案，早前被法庭裁定組織及參與未經批准集結罪成，分別被判刑11個月及1年（兩人均獲緩刑2年）。近日有消息就傳出，香港大律師公會正就定罪、對李、吳二人進行調查，如果調查結果裁定二人專業失當，最嚴重嘅處分係永久「釘牌」。廣男單純企喺常人常理嘅角度，睇呢件事比較簡單直接，如果有法律界人士有違專業操守、甚至知法犯法，咁就冇理由唔查；屬實嘅話，更加冇理由唔罰。
廣男唔係法律界人士，當然冇資格作出任何「專業預判」，但就想提出幾點質疑，同大家一齊研究下。首先，當然係法庭已經將李柱銘、吳靄儀定罪、判刑，即係佢哋的確犯咗法（雖然李柱銘已經提出上訴、要求撤銷控罪）；對於犯法之人，先唔講法律界，就算係其他專業、以至一間企業、公司，如果有人犯法被定罪，會唔會唔作出調查、處理？至於有冇緩刑，唔係重點。
誤導市民 教壞年輕人
其次，廣男又要不厭其煩強調多次，李、吳等人作為法律界人士，當日參與遊行之前，事先冇乜可能唔知道呢個係一場「未經批准的」非法遊行，亦都理應比其他人更加清楚可能招致嘅法律後果，試問，咁叫唔叫「知法犯法」？
再者，李柱銘等一眾被告一直強調自己當日「和平、理性、非暴力」，咁簡單一問，係咪以後只要人人自稱「和理非」，就都可以「和平地」去犯法？唔使承擔責任？佢哋呢種言行同歪理，絕對誤導市民，尤其極易「教壞年輕人」；大家認為呢種「效果」，又係咪同佢哋嘅身份、地位以至專業精神「相符合」呢？
必須維護法律界尊嚴
喺呢一刻，我們唔知道大律師公會打算「點查點判」；廣男睇報道話，公會執行委員會表態關注二人嘅定罪，而該執委會主席，正正係大律師公會主席夏博義，而當日又正係李柱銘提名夏博義出任公會主席；亦有報道話，負責紀律聆訊嘅紀律委員會，其主席沈士文大律師又正正係李柱銘嘅黨友，有「自己人查自己人」之嫌。講真，廣男無權干預呢啲內部事務，但必須強調嘅係，無論最後咩結果，大律師公會都好應該第一時間對外交代，並且公布全面理據俾公眾判斷。唔好忘記，關於香港法律界人士嘅專業以至尊嚴，大律師公會都有責任必須維護，所以理應俾公眾睇到一個公平嘅調查、公正嘅裁決！倘最終有人確實專業失當，咁該處罰就處罰、該釘牌就釘牌。
講到呢度，廣男諗起喺違法佔領案中，本身係執業大律師嘅陳淑莊亦都有兩項煽惑罪被定罪、判刑，大律師公會有冇對佢同樣展開調查？如果之前冇做到，係咪之後都不了了之？
原圖：rthk
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論