港人移居英國，可能賣樓套現1,500億元？每個家庭賣樓套現1,000萬元？《生果報》引述《彭博》嘅一份報告，相關數字似乎好「嚇人」，但睇真啲，相關估計唔單止係「斷估得過分」，而且其假設以至前提都問題重重；廣男就覺得，如果移英港人真係咁「富貴」，咁英國政府駛乜撥款「協助」移英港人呢？

對於《生果報》引述報告指「2021年香港將有約1.31萬至1.63萬個家庭通過BNO途徑移居英國，佔私樓家庭的0.9%至1.1%」、「如果他們全部出售自己物業，用以支付當地生活費，單計2021年便有機會套現約1,500億元」 … 廣男首先想問，係咪即係假設所有移英家庭都係私樓或者居屋等嘅業主，移民前都「有樓賣」呢？

很多香港人不是業主

坦白講，移英港人當中，當然會有業主啦，但唔好忘記，喺香港，有人有自置居所，有人租私樓住，亦有人租住公屋，《彭博》呢個報告，似乎分析得較為「直觀」，無視香港人嘅實際狀況，就係好多人根本就係「無殼蝸牛」。退一萬步講，當全部移英港人都係「業主」，廣男又要問一句，假設佢哋套現真係「套到」1,000萬元？仲係好多業主仲要還按揭貸款俾銀行，所以最後有冇三、四百萬元「落袋」都好難講！

事實上，睇新聞、睇網上論壇，大家都會見到唔少「港人移英」故事，有啲可能搵工有困難，有啲可能經濟有困難，有啲甚至想「籌旗」返香港；如果移居英國嘅港人真係咁富貴，咁英國政府又駛乜撥款幾億港元去「支援」移英港人呢？

移民或變「雙輸」？

廣男成日都覺得，移唔移民，移民去邊，絕對係每個人嘅自由選擇。曾經有朋友問廣男會唔會移民，廣男做人比較現實，直接答朋友，如果廣男同家人賣樓移民，然後去到外國搵唔到食要返嚟香港嘅話，喺香港份工無咗，家人層樓又賣咗，咁咪「輸凸」？外國嘅「民主」，對於某啲人嚟講可能吸引，但外國種族歧視等問題，更加「嚇人」！《生果報》以至個別媒體引述《彭博》報告，可能純粹係新聞報道，又可能係借機宣傳「移民」，廣男覺得，如果有人想走，大家絕對唔會「阻人發達」！ 

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk