近日，一篇喺網媒刊登、題為《夏博義：和平示威受阻或致暴力　民眾政權情緒續升溫　借鏡北愛歷史憂現冤假錯案》嘅訪問受到各界關注，甚至連中聯辦都發聲明，批評夏博義散播歪曲言論。關於夏博義嘅背景、立場以至被外界認定係「反華」嘅言論，相信市民大眾都好清楚；囍雨反而想問大律師公會，當夏博義被人認為係「反華政客」，甚至有可能累及公會嘅時候，公會係咪要一直包庇呢個「英國政客」？如果有一日夏博義玩出火「燒埋」大律師公會，又點算？

夏博義的「個人履歷」

講起夏博義，大家可能認識佢係基於佢係大律師公會主席，或者因為佢係一個英國自由民主黨成員嘅「英國政客」；其實，作為「人權大狀」嘅夏博義，早喺2008年，就有一篇文章，內容係關於支持西藏「自決」嘅；佢成為大律師公會主席，最令人「為之吃驚」嘅係佢竟然要求修改中央訂立嘅《港區國安法》；直至最近，佢公開「聲援」前年8.18同8.31未經批准集結案被告，甚至稱「若市民和平表達的權利被剝奪，民怨無法宣洩，最終或會轉向具破壞力的途徑」，更被視為助違法者開脫。喺呢啲前提底下，夏博義係咩人，市民應該睇得好清楚。

夏博義嘅為人、作風以至立場，唔難被理解。囍雨反而好奇，無錯，站於部分、大部分甚至全部大律師公會成員而言，夏博義可能係「同路人」，不論外界如何批評夏博義，公會成員都應該同夏博義站在「同一陣線」；但係其他公會成員有冇諗過，大律師公會呢個招牌，可能會因為夏博義而「搞砸」呢？

公會或被視為政治性團體？

對於夏博義嘅種種言行，有分析就講過，大律師公會係以《社團條例》註冊，夏博義作為公會主席「接連被爆出與外國存有政治聯繫」，根據相關條例第八條，如果社團該分支機構係政治性團體，並與境外政治性組織有聯繫，當局就有權命令組織停止運作。對於呢種講法，囍雨唔肯定大律師公會會否因為咁而招致任何法律責任，但如果任由夏博義發表質疑政府、法庭甚至中央嘅言論，公會被認為係政治性團體，又真係唔出奇。

唔知點解，諗起夏博義，諗起大律師公會，囍雨就諗起「壯士斷臂」、「棄車保帥」等成語或詞語。其實，大律師公會係專業團體，撇除外界認為可能有嘅「法律責任」，依家公會如果俾人感覺似係「政治團體」，其實都不恰當！

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk