近日，有「未上到車」嘅朋友喺Whatsapp傳來一啲關於房屋問題嘅數字，樓價可能會衝破歷史高位；輪候公屋嘅宗數過25萬宗；35歲以下嘅年輕人，佔香港業主幾多百份比？唔夠8%！關於房屋問題，其實「你知，我知，個個都知」，可惜嘅係，房屋以至樓價問題講咗咁耐，到今日依然係一個「無解」嘅難題；近日，有智庫組織發表研究，再一次將令人失望嘅房屋供應數字呈現喺大眾眼前。廣男覺得，如果香港再用「舊思維」處理問題，房屋問題必定「永續」！
還需要13個彩虹邨？
根據智庫組織「團結香港基金」嘅報告，過去八年，公屋動工量一直落後，對比起長策目標，累計欠大約十萬伙供應，相當於13.5個彩虹邨；至於，私樓，同期則累計欠缺大約兩萬伙供應，大約等於1.6個太古城。至於未來供應，當然亦係「唔夠數」，不論係公營房屋定係私樓，恐怕都比目標低。簡單而言，就係舊進度落後，往後嘅目標又可能「做唔到」。
根據「基金」嘅建議，認為政府應該「雷厲風行」加快推展新發展區同土地改劃，並且要精簡審批程序，建議政府就各新發展區設專項辦公室等等；又重申明日大嶼係本港長遠發展嘅關鍵。廣男認為，加快發展土地程序、做好部門之間嘅協調，係一個方法；以填海形式提供大量土地，係一個長期方法，最有效嘅方法，係「多管齊下」，全方位拓地。
棕地、借地都可考慮？
持續多時嘅房屋問題，其實相當大嘅因素係來自土地供應，關於呢一點，廣男認為社會唔應該再聚焦喺某一個或者兩個拓地方法，而係所有方法都要諗，做到嘅都應該做。除咗填海，其他拓地選項仲有發展棕地甚至請求中央政府在某地方「撥地、借地」等等；呢啲方案，唔係一定要政府跟住做，而係可以先研究、先探討。如果得嘅，應該盡快去馬；如果唔得，亦要清清楚楚地話俾市民大眾知。
廣男身邊，有唔少朋友結咗婚，但真正「上咗車」，有自己屋企嘅朋友，真係少之又少。其實，喺中央出手之下，香港嘅政治以至選舉問題都解決得七七八八，剩下來嘅行政以至施政問題，香港真係要靠自己，而且唔好再拖！
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論