睇得《生果報》多，大家都知道，呢間「媒體」從老闆到下屬、以至辦報「做新聞」嘅風格，不嬲都係好自稱「有骨氣」嘅…所以當囍雨聽到坊間有傳，近日《生果報》內部有通知，提醒啲記者、編輯注意勿再使用「武漢肺炎」字眼同Tag（標籤），而全部改為「最新疫情」、「疫苗接種」時，囍雨第一反應就係「冇可能、唔相信」。講真，「武漢肺炎」字眼喺《生果報》上用咗幾耐，大家又唔係唔知；《生果報》有幾「堅定地」反政府、抹黑內地以至攻訐中央，大家亦都心知肚明，你話，邊有可能突然間喺一個「四字詞語」上面咁容易「跪低」？
抱住半信半疑同求證嘅態度，囍雨今日真係揭嗮成份《生果報》，仲特登搵咗有關疫情嘅新聞嚟睇，咦，原本覺得冇可能、完全不可想像嘅事情，真係發生咗！囍雨喺度摘錄幾句俾大家睇下，例如：「澳紐去年3月開始爆發COVID-19疫情後」、「本港疫情反覆」、「再多一人接種COVID-19疫苗…」等等，俾囍雨嘅感覺係，《生果報》喺相關字眼上，避得就避；實在避無可避，就夾硬以英文「COVID-19」代替，但又始終唔肯好似其他中文媒體，直截了當用「新冠病毒」或者「新冠肺炎」字眼。
一邊棄用 一邊「不言棄」？
據聞，唔單止《生果報》係咁，就連台灣嘅《生果報》、甚至過去堅稱「武漢肺炎」正確嘅專欄作者，依家亦都全部轉軚；唔通——「武漢肺炎」真係一夜之間悄無聲息地喺《生果報》率先「清零」？
嗱，公道啲講，如果《生果報》真係有心改弦易轍，大家應該讚下佢；但囍雨始終有啲保留，因為奇就奇在佢轉變得「悄無聲息」。囍雨做過報館，好明白但凡白紙黑字印得出街嘅嘢，即使一個字眼，背後亦都代表住報社嘅立場，但依家《生果報》「轉軚」咁大件事，點解又完全唔見佢有任何解釋或者說法嘅呢？尤其《生果報》今日仲自己刊登咗全版廣告，標題係「蘋果人不言棄 無懼踢爆黑幕」，但就咁放棄「武漢肺炎」、放棄踢爆「武漢黑幕」？唔矛盾、唔諷刺咩？
其他黃媒會跟住「轉軚」嗎？
所以唔好怪囍雨「諗多咗」，依家《生果報》「轉變」得咁神秘兮兮，究竟係真心「好自然地」改變立場、定係內裡仲有其他古怪嘢？呢層真係要再睇定啲先；不過睇都好，起碼表面上，作為反對派喉舌嘅《生果報》已經棄用「武漢肺炎」字眼，囍雨就諗，咁其他黃絲黃媒，又會唔會跟隨其後、有所轉變呢？
唉，呢個世界，真係「無奇不有」；連《生果報》轉軚呢啲難以置信嘅嘢都會成真，之後又會唔會仲有其他同樣不可想像嘅事情發生？例如，正被起訴嘅《生果報》嘅老闆黎智英會唔會都「有所轉變」、轉為「污點證人」？囍雨都係諗到邊、講到邊啫…
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論