中方上月底宣布制裁英方9名人士及四個實體，以回應佢哋喺中國新疆問題上散布謊言及虛假信息、並以此為藉口粗暴干涉中國內政。事件「餘波未了」，末代港督彭定康日前牽頭英方103個跨黨派議員，聯署去信英國首相約翰遜，一方面反對中方向英方實施制裁，另一方面要求英國政府「制裁持續嚴重侵犯維吾爾人人權，以及制裁打壓香港民主運動的官員及實體」。彭定康如今喺英國政壇仲有幾大「政治能量」，廣男唔知，但佢呢番舉動，表現出嚟嘅就肯定係一種「政治霸道」。
彭定康還當自己是「港督」？
返番「起點」，中方因何要對英方實施制裁？係因為英國干涉中國內政、針對中國無理實施單邊制裁；講得直接啲，即係外交反制。明明有人「郁手」在先，而且係基於謊言同虛假信息，結果對方還手、反制、自衛，依家彭定康之流反而調番轉頭指摘中國「威權主義正在擴張」？呢啲係咩道理？唔係霸道咩？
再者，論新疆問題，彭定康話中國「持續嚴重侵犯維吾爾族人權」，請問，又咩事實根據呢？定係喺已有嘅謊言之上，繼續製造更大嘅謊言？講香港問題，彭定康又批評中方「制裁打壓香港民主運動」，廣男又要問下，對於香港之前持續一年有多嘅暴徒暴力，點解又唔見彭定康同其他英國政客出嚟譴責下？當彭定康基於上述歪理，仲要求英國政府針對中國採取「強而有力的政策」時，大家真係要問問彭定康，佢係咪仲當自己係「港督」呢？
英首相亦「撐警」 彭定康不出聲？
就以香港問題為例，之前有人喺街頭暴力示威，繼而演變成打砸搶燒，唔單止衝擊法治，仲威脅市民大眾生命安危，試問如果類似嘅事情發生喺英國，唔通英國政府唔會譴責暴力、拘捕示威者？近期約翰遜政府仲計劃通過法案，賦予英國警察更多執法權力應對當地示威活動，對於有示威者襲擊英國警察，約翰遜更加表態不能容忍、支持警察，點解又唔見彭定康帶頭叫人聯署反對下？更何況，如果套用彭定康針對中國嘅邏輯，咁英國政府、警察拘捕示威者、加大力度管控違法示威活動，係咪又叫侵犯人權、打壓民主運動？其他國家又係咪要制裁英國？
至於英國有議員認為中英關係已經變差、中英關係嘅「黃金時代」已經過去，廣男唔敢肯定；但可以肯定嘅係，如果中英關係真係「不復從前」，彭定康絕對係破壞者中嘅「表表者」！
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論