關於《港區國安法》，關於校園播「獨」嘅問題，過去幾年社會已經討論過好多，有一點廣男覺得好奇怪，就係《國安法》實施咗就嚟一年，但唔同嘅大學校園，都好似無就相關法例做咩教育或防範工作；最近，有報道指香港大學計劃成立委員會，評估外界針對港大有關《國安法》嘅指控，又會另設小組，關注《國安法》嘅發展。有港大教職員質疑，《國安法》又闊又嚴而且能「任意演繹」，認為委員會未必有實際作用云云。廣男反而會質疑，如果大學如果「無視」相關法律，如果他朝有教師、學生以至學生組織觸犯《國安法》，咁大學就係無盡好責任，而且一樣可能要負上責任！

港大的「往績」

有人可能會問，點解其他大學無打算設立類似機制或委員會，而港大要咁做呢？廣男唔係「局中人」，但認為當中理由其實好簡單，早喺違法佔領之前，港大已經有學生刊物鼓吹「港獨」，當時令人震驚嘅程度連時任特首梁振英都要公開警剔有關思想；前一排，港大又有學生代表要搞紀念旺角暴動嘅活動，引起全城「關注」；直至最近，港大學生會竟然發聲明攻訐中央完善香港選舉制度，稱方案「終結」香港選舉制度云云。凡此種種，港大成個「反中亂港」基地咁，咁校方又邊可能「唔做嘢」呢？

雖然廣男贊成港大設立相關委員會或小組處理關於《國安法》嘅事宜，但綜觀媒體報道，廣男覺得港大最需要做嘅事，除咗係評估「外界指控」，應該係設立一套防範有人包括學生「以身試法」嘅機制，以及推出一套整間大學學生都要學習嘅國安課程。老實講，如果只係設立一個委員會「睇下發生咩事」、「開下會」，未必治標，更加唔治本，關鍵在於，港大教職員以至學生，都要有保護國家安全嘅意識。

教育學生 才是保護學生

廣男必須強調，防範好校內可能出現違反《國安法》嘅情況，絕對唔係要限制教職員或者學生，而係大學將相關工作做得到位，最終保障嘅始終都係學生本身；試想一下，如果有學生因為一時衝動而「以身試法」，咁大學無防範或者教育好相關學生，會否因為「仁慈」而害咗學生？所以，大學包括香港大學要就《港區國安法》作出跟進，而且係徹底嘅跟進同教育！

大學，本來就係俾學生學習嘅地方，如果大學因為政治環境而變成反政府、反中央基地，成為「違法達義」者嘅搖籃，咁學生「入學」，最後分分鐘變成「入獄」。最後，廣男想講，不論港大以至其他大學如何就《港區國安法》作出跟進，理論上工作與學術自由無關，因為學術自由，係唔包括教職員、學生可以因自由而危害國家安全嘅。 

圖片來源：香港大學網頁

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk