「本人衷心感謝公民黨 － 特別是余若薇女士、梁家傑先生及吳靄儀女士 － 過去一直以來給予的栽培、機會、支持與包容，讓我有機會服務香港市民，以及捍衛香港的核心價值；並藉此機會，就本人若然曾經為公民黨帶來的不便等致歉」，神神秘秘嘅郭榮鏗走咗，佢離開香港，遠赴加拿大，呢個過程，香港市民唔知，支持者唔知，甚至連公民黨領導層都唔知，依家佢話向公民黨帶來不便「致歉」；其實郭榮鏗應該致歉嘅，係向全港市民致歉，就係因為有郭榮鏗之流嘅反對派政客，香港之前先會亂成咁！

根本沒有放港人在眼內

郭榮鏗嘅「走佬」神秘，甚至可以用鬼祟嚟形容，明明十一月接受傳媒訪問先話自己「落子無悔」，暫時無計劃離開，但就俾傳媒「踢爆」佢接受訪問後無耐就經英國出走加拿大，而且連公民黨主席梁家傑都唔知咩事；去到加拿大，佢寧願接受加拿大媒體訪問，話自己想攞返加拿大公民身份，都無接受香港傳媒訪問，原來為港人「爭取民主、自由、捍衛法治」嘅政客，見勢色唔對就會「即刻走」，反對派如此窩囊，難怪佢哋嘅反修例運動會輸得一敗塗地！

講返郭榮鏗本人，佢話「若然曾經為公民黨帶來的不便等致歉」，其實佢有冇諗過，佢對港人先造成更大嘅「不便」？內委會選主席，主持會議嘅郭榮鏗喺度「扯貓尾」拉布，令到內委會半年有多時間未能選出主席，民生法案受阻，甚至連增加產假嘅法案都受阻！據報，內委會「拉布」以及相關法律開支超過900萬元，郭榮鏗係咪要道歉兼賠錢先？

還有勾結外國勢力的「帳」

對內喺議會搞破壞，對外郭榮鏗勾結外國勢力，就令人更加氣憤！曾經一年「去四次美國」嘅郭榮鏗，不論係訪美定係同其他公民黨人「出信」，都擺明支持美國制裁香港，如果《港區國安法》當時已經生效，郭榮鏗肯定就係「叛國犯」。不過，雖然話郭榮鏗已經離開，但要「找數」嘅，始終要「找」；據報警方已經就內委會「拉布」一事作出調查，追查有冇人涉嫌公職人員行為失當？相信大家好快就會知！如果警方真係追捕、通緝郭榮鏗，曾經話要為港人「捍衛法治」嘅郭榮鏗，會唔會返香港投案呢？ 

圖片來源：郭榮鏗社交網站專頁

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk