近日，有兩單關於公民黨嘅新聞頗為值得留意，第一單係有傳媒「獨家報道」去年11月被DQ嘅公民黨前立法會議員郭榮鏗已經「走佬」加拿大，連公民黨主席梁家傑都唔知佢「行蹤」；另一單新聞，就係再有公民黨區議員退黨，該黨近半年最少已經有十人退黨。囍雨就喺度諗，先有立法會議員被DQ甚至被捕，繼而相繼有黨員「出走」，到底公民黨係咪有「滅黨」之虞？如果公民黨要繼續生存，又係咪要「轉型」一下呢？

想退黨 就退黨

據報道，荃灣區議員黃家華早前向黨高層遞信退黨，當佢接受查詢時，被問到作出決定係咪同現時政治環境及《港區國安法》有關，佢表示自己無參選立法會選舉等「更上一層樓」嘅意向，所以「無咩特別原因，想退黨就退黨」。對於黃家華以至其他退黨嘅區議員，囍雨大膽估計，佢哋選擇離開公民黨，一來因為留低喺黨「無前途」，二來隨時受到牽連，令自己本身嘅區議會議席都受影響！

追本溯源，公民黨之所以面對「重重障礙」，完全係佢哋嘅成員或者前成員咎由自取。喺議會之內，郭榮鏗主持內委會，利用主持之便「拉布」超過半年，令內委會陷入停頓，民生議案受阻；喺議會外，公民黨支持街頭抗爭行動，甚至勾結外國勢力，叫美國制裁香港。結果，佢哋嘅核心成員被DQ嘅被DQ，被檢控嘅被檢控，如果其他區議員留低，分分鐘要「陪葬」，喺自利或者自我保護嘅心態下，退黨保平安，絕對係人之常情。

回歸從政者的初心

其實，不論係實施《港區國安法》，定係完善本港嘅選舉制度，唔係要搞咩清一色，亦唔係要趕絕反對派，包括公民黨在內嘅反對派政客，仍然有機會參選，亦仍然有機會依法當選；重點在於，公民黨領導層係咪到呢一刻，都未意會到自己所犯下嘅嚴重錯誤呢？如果依然覺得勾結外國勢力無問題，或者覺得可以「合法地」無差別否決政府所有議案，咁唔好講話成員參選立法會，就算作為佢哋嘅區議員，都好難解釋呢啲行為點樣符合擁護《基本法》、效忠特區嘅法定要求。

所以，囍雨認為公民黨要繼續「玩落去」，唯一方法就係公開、坦誠地承認錯誤，並承諾該黨會改過自新；否則，一個「禍港歷史」如此深厚嘅政黨，無可能令人信服該黨以至其成員係「愛國者」！

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk