人大常委會通過修改《基本法》附件一、二，完善香港選舉制度；對於人大嘅修訂，反對派會點睇？佢哋梗係踩得就踩，全力批評啦，例如民主黨前主席劉慧卿，就話選舉以後唔再專業、獨立同客觀，好多候選人同選民都會覺得無意思再去參與，直呼「不如委任啦」。其實，劉慧卿如果咁「睇唔起」選舉，佢有冇勸啲黨友唔好再參選呢？一邊鬧，然後如果一邊繼續參選，會俾人睇唔起呢！

反對派當然要「反對」？

喺一個電台節目裡面，劉慧卿作為應該「唔會再參選」嘅政客，自然俾仲會選或者做緊議員（區議員）嘅人講嘢放膽得多，當講到新選舉制度時佢就話大家都擔心人身自由同安全，感覺非常沮喪同憂心；對於「民主派」未來嘅參選空間，佢就話自己並非領導層，唔知民主派嘅參選意欲，但坦言參選空間變得好小，即使候選人主動表忠，亦唔能夠掌握當局對於愛國者嘅定義。簡單嚟講，就係質疑新嘅選舉制度，但就無話佢嘅黨友唔選！

首先，囍雨要不厭其煩地講，中央出手完善香港選舉制度，既不等於委任，亦唔等於反對派嘅參選空間窄咗，例如依家直選分十個區，民主黨可以繼續去選，甚至連功能組別都可以去選；當中有個前提，就係參選嘅民主黨人要係愛國者，如果有黨員想「攬炒議會」但又想參選，咁當然不可能啦！

說話最好「留三分」

另一個問題，囍雨建議劉慧卿唔應該對選舉制度踩到咁盡，點解？好簡單一個道理，今日劉慧卿攻訐選舉制度，甚至講到「一文不值」，他朝如果佢啲黨友又參選立法會，咁劉慧卿到時會唔會好尷尬呢？唔通到時話選舉制度唔完美，但民主黨「寸土必爭」？再講嘅就係，咁唔滿意特區政府甚至中央，將來會唔會連區議會都唔參選呢？

選舉同議席，就如同一個政黨嘅生命線，劉慧卿作為一個已經「上咗岸」嘅人，講嘢當然「輕鬆」，囍雨睇新聞，民主黨依家應該仲有至少八十個區議員，撇除愛國者原則，呢班人之前參選時都聲明過擁護《基本法》、效忠特區，如果民主黨真係咁「型」，會唔會集體拒絕宣誓？或者下次因為唔想效忠特區而唔參選？批評政府，唔係最令人不齒，批評完、抽完政治水，然後一邊又要爭議席、「撈油水」，先令人睇唔起嘛！

圖片來源：劉慧卿Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk