關於港台嘅亂象，過去囍雨已經寫過好多次，例如有節目抹黑、誣蔑警方，有節目指台灣為「國家」，又試過有節目將暴徒佔領大學嘅違法事情完全「掉轉」嚟講；經過社會各界多時嘅批評，新一任廣播處長李百全就勇於撥亂反正，最近港台抽起原定噚晚播出嘅《鏗鏘集》，據報該集有探討中大學生會內閣「朔夜」同理大學生會當選情況。對於港台管理層嘅做法，囍雨認為支持有關決定嘅原因好簡單，如果有學生代表過往嘅言行舉止係涉嫌違法嘅，點解要作為政府部門嘅港台去訪問佢哋呢？

認清「朔夜」的立場

唔同人士要為有關港台節目開脫，好容易，例如話節目有訪問其他人，有平衡唔同立場等等。但喺呢度，囍雨首先會質疑，「朔夜」嘅立場可能涉嫌違法，點解仲要訪問佢哋呢？睇返資料，言行偏激甚至踩界嘅「朔夜」，喺佢哋嘅宣言同政綱，講到明《港區國安法》「侵犯人權、踐踏港人尊嚴和自由」，又稱《國安法》成為「極權高壓統治的政治手段」，講過要「竭盡所能對抗不義政權」等等；「朔夜」成員接受訪問，成員又表示有「被捕心理準備」，有成員更稱自己願意「為香港而死」。囍雨想問，呢班學生代表有可能涉嫌觸犯《國安法》，點解港台要訪問佢哋？

基於一班學生代表嘅「踩界」立場，港台根本就無訪問佢哋嘅必要；至於有聲音指節目平衡咗不同立場人士，包括訪問中大校董、立法會議員等建制派人士，囍雨又覺得，如果接受訪問嘅另一方係「大有問題」，就算節目有訪問其他人，以達致「平衡立場」，都係無意義。舉個例，如果有人所宣揚嘅政治主張可能違法，媒體就算有訪問其他人，但涉嫌違法人士嘅聲音一樣會傳達到出去；從做新聞嘅角度，囍雨肯定唔係所有嘢話「有平衡」就可以！

干預編輯自主？

據報，「朔夜」發聲明指港台以政治目的干預編採自主，侮辱港台人員，更剝削港人知情權。首先，港台管理層包括李百全，都係編採人員，李百全更係港台總編輯，何來干預，何來侮辱？其次，講到知情權，如果一班學生代表擺明「踩界」，佢哋嘅言論、想法以至主張，香港人又點解要知？要知嘅，應該係執法部門先啱！ 

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk