關於香港中文大學，關於中大學生甚至校長，過去近兩年時間有太多唔好嘅新聞，有中大生以「暴大人」自居，甚至參與暴力嘅反修例運動；做校長嘅，竟然相信關於反修例嘅謊言，加入抹黑警隊嘅行列。近月，因為中大嘅保安措施，又引發過一輪衝突，中大校方決定處分九名中大學生，校方並發公開信，指控近月有學生多次違反校園出入管制措施，包括拒絕出示身份證明文件，甚至攻擊保安等。囍雨就認為，校方實施唔同嘅保安措施，在於要避免校園被人破壞，如果學生身為學校一分子而唔理會措施甚至攻擊保安，懲罰佢哋就變得相當必要！

校園保安成政權魔爪？

但凡係關係到校園嘅保安措施，當然有慣於「抗爭」嘅學生反對，例如中大學生會內閣「朔夜」成員林睿睎就認為，校方嘅公開信中有關違規行為嘅準則模糊，間接賦權保安執法，「之前有同學講咗句『毅進仔』就當係Verbal Abuse」，稱擔心校園保安將成「政權魔爪」監控學生云云。其實，諸如林睿睎，有冇了解過校方點解要咁做呢？

前年11月中，中大嘅主要出入口被蒙面示威者佔據，進出大學嘅人士須向蒙面示威者展示身份證明，有示威者向公路投擲雜物，之後數以千計嘅人湧到中大，過程中有暴徒縱火、掘磚、盜用校巴，甚至大學實驗室內嘅危險品都被盜去，又同警方衝突連連。衝突過後嘅中大，可以用滿目瘡痍嚟形容，喺呢個前提底下，中大校方唔可能唔採取措施應對。

身為學生 要守校規

雖然話大學唔係中學，但如果已經係成年人嘅大學生唔守校挸，當然亦要受懲罰。當林睿睎表示擔心保安成為「政權魔爪」，囍雨反而會問，中大經過暴徒嘅蹂躪，難道中大學生唔怕校園再次被破壞？如果「出入自由」等係學生嘅權利校方要理解，其實學生們唔係都應該理解校方保護校園嘅決心咩？至於保安嘅問題，囍雨認為保安們只係執行佢哋嘅職責，或者保安們所做嘅，其實都係保護校園嘅工作，唔應該被刁難，更唔應該受到侮辱同攻擊。

所以，囍雨絕對支持中大校方撥亂反正，如果今日有學生唔守校規而唔使受罰，他日就無人會再遵守校規。囍雨唯一嘅問題係，中大「出事」頻率咁高，點解今次又唔見校長段崇智出嚟講下嘢？佢口中嘅「不會放棄」年輕人，得個講字？ 

圖片來源：中大學生會 Telegram

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk