廣男之前講過，隨著特區政府關於公職人員宣誓效忠嘅《條例》日漸臨近，相信一班反對派區議員都會陸續「表明心跡」。可能因為呢排睇過唔少「扭扭擰擰、卒之留低」嘅例子，所以當廣男睇到反對派屯門區議員李家偉日前宣布唔會宣誓時，都有少少詫異，自然會諗，係咪真先？而且對於佢話「不論宣誓與否，都是一個極為艱難的選擇」，廣男有啲唔明，叫呢班反中央、反政府嘅人宣誓效忠，就話難啫；但唔想宣誓、唔做特區嘅公職人員，有咩咁難放低呢？

講得出，做得到嗎？ 

由當初所謂嘅齊上齊落，到如今各有各撐，基本上反對派政客俾人睇到嘅「最真實」一面，就係總會「搵位」幫自己戴政治光環。就例如李家偉依家表明唔宣誓咁，一時就話唔想接受宣誓「緊箍咒」，唔會以言論自由換取留任，唔會忘記抗爭初衷；一時又指摘政府宣誓安排其實係想限制區議員嘅言論自由，批評政府「毫不留情打壓區議會」云云。

其實廣男首先最想問，李家偉依家講咁多、話自己唔宣誓，之後會唔會反口先？畢竟，政府通過相關《條例》，最快可能都要下個月，呢段時間內佢會有啲咩「心理變化」，大家真係預估唔到。之前離島區議員王進洋都好堅定話唔宣誓，結果過段時間又話要「再諗下」，再過多段時間直頭變成「會宣誓」。所以廣男建議大家不妨幫李家偉立此存照，唔好到時又好似公民黨嘅余德寶咁，搬啲諸如「唔想拱手相讓建制派」之類嘅理由為自己「名正言順留低」。

政府「打壓」 還是有人越權？

其次，廣男唔明白，咩叫宣誓安排係想「限制言論自由」？當初李家偉參選，都要簽聲明以示自己擁護《基本法》、效忠特區，當時又唔出聲話呢啲安排係「限制言論自由」？再者，何謂政府「打壓區議會」？不如廣男喺度幫大家回顧下，就以李家偉所在嘅屯門區議會為例，之前就試過要求撥款100萬元公帑買「豬嘴」面罩；之後又話要成立「公民權利地區發展委員會」、成立小組「監察及研究警方執法問題」，請大家判斷下，依家究竟係「政府打壓」，定係區議會成為咗反對派嘅越權陣地？

其實，留低好、離去又好，又冇人逼你，何須「理由多多」呢？反對派越係咁，反而越俾人感覺虛偽。就如同當初參選、簽聲明，其實講到明就係要擁護《基本法》、效忠特區，依家換個方式要宣誓，就出嚟「扮型唔妥協」，咁你當初簽嘅聲明又假成點呢？呢啲咪就係反對派囉！

原圖：李家偉fb

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk