喺民主黨嘅「基本信念」中，寫到明「民主、自由、人權及法治是現代社會進步及繁榮的基石。必須加速民主政制發展，並同時鞏固現有保障自由、人權及法治的制度，及進一步改革其不足之處」，民主黨以至其他反對派政黨，基本上都好鍾意高舉法治嘅旗幟，但實際係點？囍雨覺得不論係違法佔領定係支持反修例運動，佢哋都似係破壞法治多啲！最新例子，就係律政司去年提出嘅覆核刑罰申請多咗，民主黨前主席、律師何俊仁竟然攻訐律政司覆核刑罰等同不停向法庭「施壓、窮追猛打」，以不合比例刑罰、極高罪名狙擊被告，務求要法庭判以重罪；何俊仁咁講，算唔算係用政治角度破壞法治呢？

刑罰不足 就須覆核

對於律政司就唔同案件提出覆核刑罰，首先就算申請多咗，其實都只係得17宗；其次，就如律政司司長鄭若驊所言，覆核係因為律政司要協助法庭判處適當刑罰，以及避免犯上「可導致上訴的錯誤」；鄭又表示，如果律政司發現刑罰有原則上錯誤、或明顯過重或不足，就會申請覆核刑罰。鄭若驊一番話，反映咗律政司有其司法職責，但外界似乎就諸多質疑，除咗何俊仁之外，有傳媒報道引述某大律師，指雙方（律政司、上訴庭）目前均以「治亂世用重典」的思維處理社會問題，做法雖不屬「追殺」示威者，惟同樣無法解決社會同世代問題。囍雨認為，對於律政司覆核刑罰，根本係責任所在，如果硬要「搵位」攻擊律政司，咁似乎係佢哋政治凌駕法治。

不論係檢控、審訊、定罪、判刑、被告上訴或者律政司提出刑罰覆核，呢啲都係法治嘅一部分，律政司作為負責檢控嘅部門，履行職責，點解係向法庭施壓、窮追猛打？係咪被告多數都係反政府人士，所以就係律政司甚至法庭「有錯」？道理根本講唔通！至於話律政司要求加刑無法解決社會同世代問題嘅講法，其實律政司、法庭嘅責任就係解決法律問題，如果一定要講到社會同世代問題，囍雨又想問下，如果法庭判刑產生唔到阻嚇作用，會唔會對社會產生不良影響呢？

看看要覆核的案件

囍雨睇新聞，睇到一啲律政司提出覆核刑罰嘅案件，當中有縱火罪嘅被告原審被判感化，又有新屋嶺事件「造謠者」被判社會服務令；唔好話律政司依法辦事，正常人用常理判斷，都會覺得有覆核刑罰嘅必要。其實，法律既有懲治作用，亦有阻嚇他人犯法嘅功能，如果因為不斷出現法庭輕判嘅狀況，令人以為犯法「好小事」，咁就真係大件事喇！ 

圖片來源：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk