廣男同朋友傾開偈，大家有時都會話，做反對派政客真係「好難」，有咩難？係「左右為難」。就好似之前一般反對派立法會議員玩「總辭」，一時要「抗爭」，一時又要「顧及民意」；又例如廣男噚日提過嘅離島區區議員王進洋同油尖旺區議員陳梓維，前者，就由「唔宣誓」到「未決定」、再到「留低」，好「艱難」咁完成咗「自我說服」；而後者，就喺「不畏強權」同「成為中央『眼中釘』」之下，決定「跟隨宣誓」。今日，又輪到公民黨嘅油尖旺區議會副主席余德寶。

余德寶的「艱難抉擇」

已經透過facebook表明會宣誓嘅余德寶，面對嘅「兩難」有好多，例如「有很多原因可以說得名正言順而離開，但總要有人選擇留下」；又例如，如今「從政風險高」，有街坊勸佢「明哲保身，及早退場」，但「不能連區議會也拱手相讓給建制」等等，總之「選擇留下、離開也是困難」，不過「我會宣誓」。廣男睇落，余德寶似係想「名正言順地留低」多啲喎！其實，最大嘅「兩難」，會唔會係一邊要諗點保住「份工、份糧」，另一面要諗點同支持者交代？

對於余德寶嘅艱難抉擇同留低意志，相信大家都get到嘅；但廣男唔明，佢所謂「不能連區議會也拱手相讓給建制」，係咩意思呢？第一，就算因為有議席出缺，喺依家疫情之下，都未必會有補選；第二，就算有補選，都可能係反對派贏，點「拱手相讓」法？反對派嚟嚟去去又係呢套藉口？想留低，咪直接講囉，成日講埋啲乍聽落好似好有道理、但諗深一層其實完全冇邏輯嘅嘢，何必呢？！

再者，余德寶喺佢「留低感言」裡面提到，「看到很多熟悉的臉孔不是被奪去政治權利、便是身陷窘境」，又係想表達咩？如果佢講緊嘅係涉違《國安法》而被捕，或者早前被依法DQ嘅同路人，咁大家真係要反問一句，勾結外力嘅政客唔應該被DQ？涉違《國安法》嘅人唔應該被依法拘捕、起訴？作為特區公職人員，喺呢啲大是大非嘅原則問題上面，講清楚啲好！

不真誠 不如早離去

廣男估計，隨住特區公職人員宣誓制度逐步落實，日後陸續仲會有反對派議員以「各種理由」表明留低，其實，反對派想繼續參政議政、繼續從政之路，唔係問題，關鍵在於佢哋係咪真誠擁護《基本法》、效忠特區，係咪真心愛國；如果有啲人想留低，係為咗不斷搵機會「明攻暗訐」政府、陽奉陰違、甚至反政府反中央，廣男奉勸一句，不如早點離去吧！

原圖：余德寶fb

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk