如准我繼續留下 我便留下

你說一句 我便停留

讓愛昇華 總為你牽掛

卻不懂講出真話

如准我繼續留下 我便留下

你的心裡 已亂如麻

力竭筋疲 倚傍我好嗎

再不須分真假 接受變化 ……

近日睇到「視帝」羅嘉良嘅新聞，唔知點解就令廣男諗起佢首《准我留下》。聽下聽下，原來呢首歌好「應景」，尤其適合反對派嘅區議員聽，點解？事關唔少對宣誓問題「扭扭擰擰」，到最後都係「如准我繼續留下 我便留下」；除咗之前講到明會離任、依家又話留低嘅離島區議員王進洋之外，連出名「觸摸唔到」嘅油尖旺區議員陳梓維都決定宣誓。其實，想留低「為市民服務」好，定為錢想留低都好，直接講咪得囉，講咁多「理由」，反而俾人感覺仲虛偽，好心唔好咁造作啦！

因為被釘上 所以我宣誓？

首先，真係要講講人稱「維維」嘅陳梓維，佢喺社交平台先話自己「不畏強權，處事認真」，然後話鋒一轉，就話「可惜同時，收到大陸親友通知我，其公安部門已搵了我大陸親友約談」，跟住表示「我相信我作為新移民身份已成中共眼中釘，所以在此決定會跟隨會宣誓的民主派誓」。既然「維維」不畏強權，又點會怕中央呢？又或者，如果已經成為中央嘅「眼中釘」，咁仲宣誓？唔怕俾人DQ咩？「維維」嘅思維，真係唔係廣男呢啲平凡人所觸摸到。

除咗「維維」，廣男當然亦要講下一時話唔宣誓、一時「未決定」，依家又話「留低」嘅離島區議員嘅王進洋啦！呢個反口覆舌嘅反對派政客，聲稱「留下來，多一個工具，口號雖然係旗幟；口號雖然是旗幟，但現在來說，也只是其次」，廣男又想問下，佢如果宣誓「留低」，所謂「多個工具」，係咩工具？廣男睇落去，似係多個「生財工具」多啲囉！

小心賠了夫人又折兵

其實，不論係想點，為名好，為利也好，反對派區議員想宣誓留任，最應該做嘅唔係喺度公開或者向傳媒「打嘴炮」，而係以行動證明自己係擁護《基本法》、效忠特區，以至證明自己係愛國者。老實講，反對派要參政、做議員，無問題，但如果言行舉止都被人認為係「反中亂港」分子，而仲想宣誓搏「留任」，之後宣誓但最後俾政府DQ，咁就真係「賠了夫人又折兵」喇！ 

原圖：陳梓維fb、王進洋fb

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk