去年七月，一單關於公民黨嘅新聞，囍雨都依家仍然「印象深刻」，話說選舉主任當時向多位已經報名參選立法會選舉嘅反對派參選人發信，包括要求佢哋回應佢哋之前乞求外國制裁香港、否決財政預算案等重要法案等問題；其中公民黨三名參選人包括楊岳橋、郭家麒同郭榮鏗，就回覆指唔會要求美國制裁本港，甚至指選舉主任嘅指控屬「主觀詮釋和假設」。不過，事實係前年九月，原來佢哋去信美國國會，誠摯地懇求「閣下及閣下的同僚」盡快通過（香港人權與民主）法案；事後唔少網民都怒斥公民黨講大話，「罪證確鑿，無得抵賴」！今日睇返呢單新聞，再諗起公民黨可能「滅黨」，完全有一種「事出必有因」嘅感覺！

公民黨討論「路向」？

囍雨之所以重提呢單新聞，主要係因為囍雨早前睇新聞，見到公民黨上周末舉行退修會，討論有關區議員宣誓同路「路向」問題。對於相關問題，有公民黨中人預計，未來或會有黨員辭去區議員職務，甚至有人退黨，但相信公民黨仍有足夠「政治人才」繼續「走下去」；而對於公民黨嘅存留問題，就有知情人士承認，會上曾有領導層提及公民黨未來路向嘅各種可能，然而重申唔會解散公民黨云云。簡單嚟講，公民黨應該仲想玩落去！

對於公民黨嘅「路向」，囍雨睇得比較直白，問題嘅關鍵，在於公民黨如果想「走下去」，繼續從政以及參政，佢哋嘅黨以至成員係咪願意擁護《基本法》同效忠特區。如果佢哋要繼續反中亂港甚至勾結外國勢力，囍雨建議佢哋不如最好早啲「關門大吉」，唔係轉頭搞唔成革命，啲成員可能仲要承擔「罪責」。

想參選 先承錯

走另一方向，公民黨想繼續「玩」，由於佢哋有深厚嘅勾結外國勢力、反中亂港歷史，囍雨認為佢哋單純話自己會擁護《基本法》、效忠特區，應該係未必足夠嘅。囍雨有個建議，就係佢哋可以公開向市民、特區政府以至中央公開道歉，對自己過往嘅所作所為誠心認錯，並承諾以後唔會做出任何損害國家安全同利益嘅事。如果公民黨連公開承認過錯都唔肯，而又想繼續參選，囍雨只能講句，好難搞喎！

對於法律問題，公民黨可能「好叻」，但對於政治問題，公民黨似乎成立咗十幾年，仲好似「初哥」咁；囍雨喺度奉勸公民黨一句，想「佔兩邊便宜」，一方面「親美」，一方面做「特區議員」？呢個世界無咁著數！如果想參選，就應該洗心革面，誠心認錯！

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk