「藝術嘅嘢，你識乜呀？」只要用呢句說話做反駁，好似即刻回應甚至「秒殺」咗坊間對一啲「藝術品」嘅批評同質疑，但係囍雨想問，係咪只要講一樣嘢係「藝術品」，就可以做乜都得，或者表達乜嘢都得呢？最近，自從有媒體揭發西九文化區嘅M+博物館疑似收藏極具爭議性嘅「藝術品」，包括艾未未一件對住天安門舉中指嘅作品後，一般人都認為作品既涉及侮辱甚至反國家訊息，但另一邊就話藝術就係借藝術作品提出問題、質疑云云。坦白講，如果「舉個中指」、表達「質疑」就叫藝術品，囍雨只能夠講句，囍雨真係唔識囉！

這是公帑營運的博物館

老實講，有人要收藏、鑑賞唔同嘅「藝術品」，呢啲係個人嘅問題，但如果要用大量公帑去買涉及不文手勢甚至有反國家訊息嘅「藝術品」，咁囍雨一定反對！M+博物館，唔係私人博物館，而係用公帑營運，作品係要用公帑去買嘅；囍雨真心想問下負責購買M+館藏嘅人，用公家錢去買質疑甚至侮辱國家嘅作品，係咩玩法？因為係「藝術」，所以香港人「唔明白」，就要任由公帑咁樣用法？

除咗涉及公帑，同樣重要嘅問題係，一啲涉及不文手勢或者其他不良意識嘅作品，被購買並喺香港嘅博物館M+展出，咁M+博物館，又係咪一個老少咸宜嘅博物館呢？如果將來有家長帶同年幼子女到M+睇藝術品，發現原來對住國家地方「舉下中指」又係「藝術品」，咁家長點解釋？小朋友如果有樣學樣對住父母及師長舉不文手勢，然後話係行為藝術，我哋又係咪要「欣然接受」呢？

創作自由不等於一切

囍雨覺得，今次關於M+博物館作品嘅爭議，同之前出現喺校園以至社會嘅爭拗都有類同之處，之前「違法達義」歪風喺校園出現，唔同嘅大學學者都喺度討論點樣違法「佔中」，當時啲就話呢啲係學術自由；之後「港獨」思潮興起，就有人話係言論自由；如今M+有藝術品出現問題，當然亦有人話呢啲係涉及藝術創作自由等等。但係，如果藝術自由可以跨越道德同法律界線，咁係咪藝術作品就算觸犯法律包括《港區國安法》都無問題呢？答案當然唔係啦！就好似喺港鐵講粗口，其實可以係觸犯附例；又或者一個中學生如果喺學校向其他人做粗口手勢，相信都係觸犯校規一樣。情況套用到所謂藝術作品上，囍雨唔認為藝術作品可以「任意妄為」。 

關於M+博物館嘅問題，M+嘅管理者必須處理，如果M+嘅管理者處理唔到或者「唔處理」，西九文化局就要處理！如果兩者都唔處理，咁政府官員就責無旁貸！總知屬於香港政府以至市民嘅博物館，絕對唔可以亂嚟，被人利用嚟反政府、反中央。

圖片來源：rthk、westkowloon.hk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk